Infrastrukturë e re në Tushilë të Skenderajt: Nisin punimet për asfaltimin dhe sanimin e dëmeve nga vërshimet

Fshati Tushilë në komunën e Skenderajt është bërë dëshmitar i nisjes së punimeve për asfaltimin e segmenteve hyrëse të urës së re, si dhe rehabilitimin e disa rrugicave që pësuan dëmtime të rënda nga përmbytjet gjatë viteve të fundit. Kryetari i Komunës së Skenderajt, Sami Lushtaku, ka njoftuar se këto ndërhyrje vijnë si përgjigje e drejtpërdrejtë për riparimin e pasojave të vërshimeve dhe rikthimin e kushteve normale të lëvizjes për banorët e kësaj ane. Sipas kreut të komunës, krahas rregullimit të hyrjeve të urës, po punohet intensivisht edhe në shtrimin me asfalt të rrugicave dytësore, me synim përmirësimin e qarkullimit dhe ngritjen e cilësisë së infrastrukturës lokale. “Komuna e Skenderajt, përkundër vështirësive financiare, po vazhdon ndërhyrjet në terren, duke u përkujdesur për mirëmbajtjen e infrastrukturës publike rrugore në pjesë të ndryshme të territorit të komunës sonë”, ka deklaruar Lushtaku.