Brukseli cakton afatin: Shqipëria dhe Mali i Zi drejt anëtarësimit në BE deri në vitin 2030

Me një qasje realiste dhe pak fat, Shqipëria ka mundësinë reale të bëhet pjesë e Bashkimit Europian deri në vitin 2030. Gjatë prezantimit të strategjisë së re të zgjerimit në Parlamentin Europian, zyrtarja e lartë Marta Kos ka bërë publike synimin e prekshëm të Brukselit për këtë proces. “Ëndrra ime, që tashmë nuk duket më si e tillë, por e mbështetur në realitet, është që të shoh të paktën dy deri në tri vende të bëhen anëtare të BE-së deri në vitin 2030, nëse ato i plotësojnë kushtet dhe e meritojnë”, u shpreh Kos. Gjatë mbledhjes së Komisionit të Jashtëm të PE-së, eurodeputetët nuk shfaqën rezerva të theksuara për ecurinë e shteteve kandidate. Përjashtim bëri vetëm shqetësimi i ngritur nga një eurodeputete e majtë franceze në lidhje me projektin e Jared Kushner në zonën e Zvërnecit. Megjithatë, përgjigja e dhënë la të kuptohet qartë se çështjet mjedisore nuk do të bëhen pengesë për integrimin europian të vendit. “Sigurisht, ne jemi në dijeni të të ashtuquajturit projekt të Kushner në Shqipëri. Prandaj, po i kërkojmë qeverisë shqiptare që të përshtasë plotësisht legjislacionin e saj mjedisor me standardet e Bashkimit Europian”, theksoi ajo. Në krahun tjetër, diskutimet më të nxehta vazhdojnë të zhvillohen brenda vetë bllokut europian, ku mospajtimet lidhen kryesisht me ruajtjen e të drejtës së vetos nga disa shtete anëtare. “Kemi pasur qasje të ndryshme. Disa shtete kërkojnë një mekanizëm më efikas, ndërsa të tjerë këmbëngulin fuqimisht në ruajtjen e unanimitetit sa më gjatë të jetë e mundur. Ne nuk synojmë ta shfuqizojmë plotësisht unanimitetin, por sugjerojmë disa kufizime specifike për ta bërë procesin më funksional”, shtoi Kos. Po çfarë do të nënkuptonte financiarisht për qytetarët europianë pranimi i shteteve të reja si Shqipëria? Sipas llogaritjeve, kostoja përballohet lehtësisht, duke u krahasuar me çmimin e një kafeje. “Le të flasim hapur: Mali i Zi ka rreth 650 mijë banorë, afërsisht sa qyteti i Shtutgartit apo Tuluzës. Kjo do t’i kushtojë unionit tonë rreth 380 deri në 420 milionë euro, ndërkohë që do të shohim edhe kontributin e tyre në BE. Në terma të thjeshtë, kjo i bie më pak se 1 euro në vit për çdo qytetar europian. Një kosto që ne mund ta përballojmë pa asnjë problem, njësoj si për Shqipërinë, ashtu edhe për Moldavinë”, përfundoi ajo.