Mjeku Darko Vasilevski ndërpret grevën e urisë: U largova me kokën lart për të mbrojtur të drejtat tona

Mjeku Darko Vasilevski ka vendosur t'i japë fund protestës së tij ekstreme me grevë urie, e cila po zhvillohej në hapësirat para Dekanatit të Fakultetit të Mjekësisë. Nëpërmjet një deklarate të bërë publike në rrjetet sociale, ai theksoi se pavarësisht përkeqësimit të gjendjes shëndetësore gjatë kësaj periudhe, tërhiqet i qetë dhe me krenari, duke qenë se ia doli të bëjë publike trajtimin e padrejtë që u bëhet shpesh profesionistëve të shëndetësisë. Lidhur me këtë hap, Vasilevski shprehu bindjen se vendimi i tij do të shërbejë si një kthesë e rëndësishme, që do t'i japë zë trajtimit më të hapur të ngjarjeve të ngjashme në të ardhmen. Gjatë këtij reagimi, ai nuk la pa përmendur mbështetjen e pakursyer që mori nga një mik dhe koleg i afërt mjek, i cili e vizitoj nga afër, si dhe falënderoi përzemërsisht të gjithë qytetarët që e mbështetën fizikisht ose përmes mesazheve inkurajuese. “Pas një bashkëbisedimi të shkurtër me drejtuesin e Fakultetit të Mjekësisë, arrita të kuptoj se, ngjashëm me Don Kishotin, po përpiqesha të luftoja kundër mullinjve të erës dhe se kërkesat e mia ndaj institucioneve ishin tepër optimiste,” ka shkruar ndër të tjera Vasilevski. Sipas tij, për afro shtatë ditë me radhë kishte pritur kot një reagim institucional, një pyetje të thjeshtë për shëndetin e tij, një nismë për zgjidhje apo qoftë edhe një ftesë për një tryezë bisedimesh. Në fund të fjalës së tij, doktori vuri në dukje se do t'i rikthehet pasionit të tij kryesor, ushtrimit të profesionit, duke u fokusuar te ngritja e mëtejshme akademike, përsosja e aftësive dhe zgjerimi i përvojës, me synimin e vetëm që të mbetet gjithmonë besnik ndaj misionit të tij më të lartë: të jetë një mjek i përkushtuar dhe shembullor.