Tragjedi në kufirin kroato-slloven: Pesë emigrantë humbin jetën në ujërat e lumit, pesë të tjerë shpëtohen

Një ngjarje e rëndë është regjistruar të premten në zonën kufitare mes Kroacisë dhe Sllovenisë, ku pesë emigrantë kanë ndërruar jetë tragjikisht pasi janë mbytur gjatë përpjekjes për të kaluar lumin. Ndërkohë, fatmirësisht, pesë persona të tjerë kanë mundur të shpëtohen nga autoritetet dhe banorët lokalë. Alarmi u dhënë pasi një grup personash, që dyshohet se ishin emigrantë, u pikasën në lumin Kupa, afërsisht 90 kilometra në jugperëndim të kryeqytetit kroat, Zagrebit. Policia kroate, përmes një njoftimi zyrtar për shtyp, bëri të ditur se pavarësisht ndërhyrjes për shpëtimin e të huajve, pesë prej tyre nuk mundën të mbijetonin, ndërsa ende nuk janë bërë të njohura kombësitë e viktimave. Në lidhje me dinamikën e ngjarjes, policia shpjegoi se grupi përbëhej nga rreth njëzet persona në total, prej të cilëve 14 veta kanë arritur që të kalojnë me sukses rrjedhën e lumit dhe aktualisht ndodhen në territorin e Sllovenisë. Kroacia vazhdon të mbetet një nga nyjet kryesore të kalimit për emigrantët e parregullt, të cilët synojnë të depërtojnë drejt vendeve të Evropës Perëndimore përmes korridorit të Ballkanit. Të dhënat zyrtare nga Agjencia Evropiane e Rojës Kufitare dhe Bregdetare (FRONTEX) tregojnë se gjatë vitit 2025 mbi 12,500 persona kanë kaluar përmes kësaj rruge, duke shënuar një rënie prej 42% krahasuar me periudhën e njëjtë të vitit 2024. Megjithatë, kostoja njerëzore e këtij udhëtimi mbetet tejet e lartë. Sipas shifrave të bëra publike nga Organizata Ndërkombëtare për Migracionin (IOM), agjenci kjo e sistemeve të OKB-së, që prej vitit 2014 më shumë se 400 njerëz kanë humbur jetën ose janë shpallur të zhdukur gjatë përpjekjeve për të përshkuar këtë rrugë të rrezikshme.