Bekim Sali takon zyrtaren e lartë holandeze Bakker: Rruga evropiane kërkon meritokraci dhe parashikueshmëri

Zëvendëskryeministri i parë dhe ministri për Çështje Evropiane, Bekim Sali, ka pritur në një takim zyrtar zëvendësministren për Çështje të Bashkimit Evropian të Mbretërisë së Holandës, Heleen Bakker. Diskutimet u përqendruan te rrugëtimi i Maqedonisë së Veriut drejt familjes evropiane, ecuria e reformave vendimtare dhe hapësirat për zgjerimin e bashkëpunimit dypalësh. Sipas njoftimit zyrtar nga kabineti i tij, Sali i ka adresuar fjalë falënderimi shtetit holandez për mbështetjen e palëkundur ndaj perspektivës evropiane të vendit, si dhe për ndihmën e dhënë në konsolidimin e shtetit të së drejtës, ngritjen e institucioneve demokratike dhe zhvillimin e kapaciteteve administrative. Ai veçoi rëndësinë e bashkëpunimit përmes programit holandez MATRA për transformim shoqëror, duke e cilësuar kyç për sundimin e ligjit dhe transferimin e ekspertizës ndërinstitucionale. Gjatë bisedës, ministri bëri të qartë qëndrimin se procesi i integrimit evropian duhet të karakterizohet nga drejtësia, parashikueshmëria dhe vlerësimi i bazuar në merita, i shoqëruar me standarde transparente që masin me saktësi reformat dhe arritjet në terren. Në vijim të takimit, Sali njohu homologun e tij me hapat e ndërmarrë në realizimin e Agjendës së Reformave dhe prioriteteve që dalin nga Plani i Rritjes për Ballkanin Perëndimor. Ai vuri në pah se integrimi hap pas hapi duhet t'u sigurojë qytetarëve dhe sipërmarrjeve përfitime konkrete, duke shërbyer si shtysë për të intesifikuar reformat drejt anëtarësimit përfundimtar. Palët shqyrtuan gjithashtu perspektiva të reja për bashkëpunim në drejtim të konsolidimit institucional, ndarjes së praktikave më të mira dhe jetësimit të nismave dhe projekteve të përbashkëta.