Yjet dhe futbolli: Libri i ri zbulon prapaskenat e bujshme të divorcit mes Tom Brady dhe Gisele Bundchen

Një biografi e sapopublikuar hedh dritë të re mbi arsyet që çuan në ndarjen e bujshme mes legjendës së NFL-së, Tom Brady, dhe supermodeles Gisele Bundchen. Pas një dekade së bashku, çifti i famshëm i dha fund martesës së tyre në vitin 2022. Në librin e ardhshëm të Lars Anderson, i titulluar “Brady: Një histori amerikane dhe çmimi i madhështisë”, një burim i afërt me sportistin pretendon se ishte pikërisht Bundchen ajo që vendosi t'i jepte fund lidhjes së tyre për arsye astrologjike. “Një ditë, Gisele, e cila është shumë e interesuar për astrologjinë, hodhi sytë nga yjet dhe i tha Tom-it: ‘S'jemi të përputhshëm’. Dhe, pikërisht kështu, gjithçka mori fund”, thuhet në një fragment të librit. Autor Anderson vë në dukje se modelja kishte shprehur dëshirën që Brady të linte futbollin amerikan qysh në vitin 2017. Vendimi i tij kokëfortë për të vazhduar karrierën ushtroi një trysni të vazhdueshme mbi martesën e tyre. Sipas shkrimit të autorit, pasi Brady dhe skuadra e New England Patriots triumfuan në Super Bowl në vitin 2019, Bundchen iu drejtua me pyetjen: “A nuk do të ishte ky momenti i përsosur për t’u tërhequr nga futbolli?”. “Sa keq, zemër. Po argëtohem shumë tani”, mësohet t'i jetë përgjigjur atëbotë Brady. Autori sjell në vëmendje edhe një mesazh të drejtpërdrejtë që Bundchen i dërgoi sportistit pas humbjes së Patriots në Super Bowl-in e vitit 2018, duke dëshmuar se ajo kishte nevojë për praninë e tij fizike dhe emocionale në shtëpi, e jo për një bashkëshort të zhytur te telefonat apo që rianalizonte lojërat në mendje. “Ajo kishte nevojë për më shumë ndihmë me fëmijët. Kishte nevojë të mund të flinte pak më gjatë disa ditë në javë. Kishte nevojë për më shumë kohë për karrierën e saj”, shkruan Anderson në librin e tij. Një mik i ngushtë i Brady-t ka shpjeguar se si rutina e rreptë e yllit të futbollit mund të ketë rënduar ndjeshëm atmosferën në familje. “Ai zgjohet në agim, mendon gjithë ditën për një lojë që është e huaj për gruan e tij, kthehet në shtëpi dhe shkon në shtrat çdo natë në orën nëntë. Nuk mund të hajë apo të dalë në një restorant pa shkaktuar rrëmujë. Gjithçka që ha i duket e neveritshme. E gjithë kjo mënyrë jetese duhet të jetë bërë e lodhshme për Gisele-n”, u shpreh burimi. Kujtojmë se Brady luajti për New England Patriots për afro dy dekada, përpara se të transferohej te Tampa Bay Buccaneers në vitin 2020, ndërsa në vitin 2023 i dha lamtumirën përfundimtare fushave të gjelbra. Tom Brady dhe Gisele Bundchen kanë dy fëmijë së bashku, Vivian dhe Benjamin, ndërsa sportisti është gjithashtu baba i një djali me emrin Jack, nga lidhja e tij e mëparshme me Bridget Moynahan. Ndërkohë, Gisele Bundchen nisi një kapitull të ri në jetën e saj, duke u martuar në vitin 2025 me instruktorin e arteve marciale Joaquim Valente, me të cilin po atë vit mirëpriti në jetë fëmijën e tyre të parë.