Lorik Ilazi paralajmëron sfidën e radhës: Duel tejet i vështirë ndaj Olympiakosit

Kryetrajneri i Dritës së Gjilanit, Lorik Ilazi, ka shprehur mirëqenien e tij për paraqitjen e volejbollisteve gjilanase në takimin hapës të Ligës Ballkanike për klube, të zhvilluar ditën e djeshme në Strumicë. Skuadra nga Kosova triumfoi me rezultatin 3:1 ndaj ekipit maqedonas, Nakovski Volley, duke e nisur në mënyrën më ideale aventurën në këtë garë rajonale. Edhe pse është ndarë i kënaqur me ritmin e treguar, Ilazi tashmë e ka fokusin plotësisht te përballja e radhës, e cila paralajmërohet të jetë dukshëm më e vështirë, përballë gjigantit grek, Olympiakos. “Arma jonë më e fortë ishte mbrojtja e organizuar dhe loja më e kujdesshme në sulm,” u shpreh ai fillimisht. Duke analizuar kundërshtarin e djeshëm, ai shtoi: “Nakovski Volley na vuri në vështirësi me shërbim të fuqishëm dhe mbrojtje shumë të fortë gjatë gjithë ndeshjes. Në setin e parë përfitoi nga gabimet tona, si në pranimin e topit të parë, ashtu edhe në sulm.” Megjithatë, strategu i Dritës theksoi se reagimi i vajzave ishte në lartësinë e duhur: “Megjithatë, pas atij seti ekipi reagoi mirë, tregoi më shumë përqendrim dhe bëri zgjedhje më të mira në sulm. Kjo na mundësoi të fitonim tri sete radhazi dhe ta nisnim turneun me fitore.” Në prag të sfidës së sotme që do të luhet duke filluar nga ora 17:00, trajneri Ilazi shpreson në një paraqitje cilësore, pavarësisht forcës së kundërshtarit nga Greqia. “Sot ndaj Olympiakosit na pret një përballje shumë e fortë,” paralajmëroi ai. Më tej, ai ka vlerësuar lart nivelin e kundërshtarit: “Për mendimin tim, kampionati grek është ndër dhjetë kampionatet më të forta në botë, ndërsa Olympiakosi është një nga klubet kryesore të Greqisë, me shumë tituj dhe përvojë të madhe në garat evropiane.” Në aspektin e përgatitjeve fizike dhe kompletimit të skuadrës, Ilazi pranoi se ende nuk gjenden në majën e formës së tyre. “Ne ende nuk jemi në formën tonë më të mirë. Ekipi ka ndryshuar pothuajse tërësisht nga sezoni i kaluar; në përbërjen bazë ka mbetur vetëm liberoja Prenga,” u shpreh ai. Ai gjithashtu shpjegoi se këto ndryshime rrënjësore kërkojnë periudhën e tyre kohore: “Këto ndryshime kërkojnë kohë për të krijuar lidhjen dhe koordinimin e duhur mes lojtareve.” Pavarësisht sfidave, optimizmi mbetet i lartë në kampin gjilanas: “Megjithatë, po përparojmë çdo ditë dhe po punojmë për të arritur formën tonë më të mirë.” “E dimë çfarë na pret, por do të japim maksimumin, do të luftojmë për çdo pikë dhe nuk do të dorëzohemi deri në pikën e fundit,” përfundoi Lorik Ilazi.