Kraki optimist për Hagën: Besoj fuqishëm se do ta fitojmë betejën në shkallën e dytë

Deputeti i Lëvizjes Vetëvendosje, Nezir Kraki, ka shprehur besimin e tij se procesi i apelit për ish-krerët e Ushtrisë Çlirimtare të Kosovës (UÇK) në Hagë do të kurorëzohet me sukses, falë një angazhimi gjithëpërfshirës shtetëror dhe një strategjie të mirëmenduar. Këto deklarata Kraki i ka dhënë teksa ka komentuar edhe zgjedhjen e Presidentes së re të Republikës së Kosovës, Justina Shiroka – Pula. Ai ka theksuar se nuk ka asnjë vërejtje për këtë zgjedhje, duke vlerësuar lart profilin e saj intelektual dhe njerëzor. “Profesoresha e nderuar gëzon respekt për profilin intelektual, historikun familjar, qetësinë dhe urtësinë që e ka treguar ndër vite. Absolutisht asnjë vërejtje. Urime asaj, urime të gjithëve”, është shprehur Kraki. Ai gjithashtu ka prekur qëndrimin e Lidhjes Demokratike të Kosovës lidhur me procesin e votimit të presidentes së re, duke vlerësuar se kjo parti, pavarësisht vijës së saj, u bë pjesë e këtij momenti të rëndësishëm. “LDK-ja ka qëndruar në atë vijë që e ka pasur. Për president, mirë do të kishte qenë ta votonte, por erdhi, u bë pjesë e festës”, ka deklaruar ai. Krahas çështjes së presidencës, mbrëmjen e së martës u shënua një zhvillim tjetër i rëndësishëm me miratimin e Ligjit për Dhomat e Specializuara nga deputetët e Kuvendit. Sipas Krakut, ky zhvillim krijon hapësirë institucionale për t’iu qasur më ndryshe çështjeve që lidhen me Hagën. “Ligji për Dhomat e Specializuara është i duhur. Tash që kemi Kuvend fuqiplotë në mandat, ka hapësirë për një pako më agresive për t’iu qasur dosjes së Hagës, si zhbërjen dhe kontrollin e saj”, ka theksuar deputeti. Megjithatë, lidhur me ndikimin e mundshëm të këtij ligji në procesin aktual të apelit ndaj ish-krerëve të UÇK-së, Kraki ka bërë të qartë se korniza e re nuk mund të prodhojë efekt prapaveprues në këtë fazë. “Ky ligj, fatkeqësisht, nuk mund të ndikojë në apel. Apeli do të organizohet në kuadër të ligjeve ekzistuese. Ne do të mobilizohemi të gjithë ta fitojmë apelin”, ka vijuar ai. Duke shfaqur shpresë në mbështetjen e gjithanshme institucionale, ai ka përsëritur se beteja ligjore do të zhvillohet brenda rrethanave ekzistuese, ku synohet korrigjimi i gabimeve të së kaluarës. “Lufta do të zhvillohet në arenën që veçse ekziston, atje ku ka ndodhur gabimi i vitit 2015 dhe i vendimeve të tashme. Kam shpresë që, me mobilizim masiv shtetëror dhe strategji të fortë, do t’ia dalim ta fitojmë apelin”, ka shtuar Kraki. Në fund të prononcimit të tij, deputeti i Lëvizjes Vetëvendosje ka theksuar se aktet e tilla ligjore do të shërbejnë në të ardhmen për mbrojtjen e vlerave sublime të luftës çlirimtare dhe personaliteteve që sakrifikuan për vendin.