Nga Kosova në Arabi Saudite, Thomas Brdaric zyrtarizohet te skuadra e re

Trajneri Thomas Brdaric ka mbyllur aventurën e tij në krye të Malishevës për të nisur një kapitull të ri në karrierë, duke marrë drejtimin e klubit arab Al Bukiryah si kreu i ri i shtabit teknik. Përmes një njoftimi zyrtar, klubi saudit ka bërë të ditur se ka arritur marrëveshjen përfundimtare me teknikun gjerman, i cili tashmë do të jetë përgjegjës për udhëheqjen e skuadrës së parë që garon në First Division League. Sipas njoftimit të lëshuar nga vetë klubi, Brdaric pritet t'i bashkohet menjëherë ekipit për të nisur nga puna dhe për t'u përgatitur intensivisht për sfidat e ardhshme kampionale. Kujtojmë se Thomas Brdaric ishte në krye të Malishevës që nga muaji qershor i këtij viti, periudhë gjatë së cilës regjistroi suksese historike në arenën evropiane, duke kaluar një raund në Ligën e Konferencës përpara se të eliminohej nga skuadra e Hibernian.