Tragjedi në aksin Fushë-Krujë – Krujë: Humb jetën 19-vjeçari, dy të plagosur rëndë nga përplasja zinxhir

Një aksident me pasoja fatale ka tronditur mbrëmjen e djeshme zonën e Kamerasit, në aksin rrugor që lidh Fushë-Krujën me Krujën. Përplasja e fuqishme mes tre automjeteve ka rezultuar tragjike, duke i marrë jetën një të riu. Sipas të dhënave zyrtare, viktima është identifikuar si shtetasi me inicialet L.Z., 19 vjeç. Përveç humbjes së jetës së të riut, nga përplasja kanë mbetur të lënduar rëndë edhe dy persona të tjerë, të cilët janë dërguar me urgjencë drejt Spitalit të Traumës në Tiranë për të marrë ndihmën e specializuar mjekësore. Në këtë ngjarje të rëndë janë përfshirë tre mjete: një Mercedes Benz, një Audi dhe një Volkswagen. Forcat e rendit kanë nisur hetimet për të zbardhur dinamikën e plotë të përplasjes. Nga hetimet paraprake, autoritetet dyshojnë se shkaktarët kryesorë të këtij aksidenti kanë qenë shpejtësia tej normave të lejuara dhe prezenca e lagështisë në rrugë, faktorë që kanë bërë të pamundur kontrollin e automjeteve nga ana e drejtuesve.