Teherani kërkon ulje të tensioneve: Plan 7-ditor për zhbllokimin e Ngushticës së Hormuzit

Irani ka ndërmarrë një hap diplomatik duke i dorëzuar Shteteve të Bashkuara të Amerikës një propozim konkret për rihapjen e Ngushticës strategjike të Hormuzit. Ministri i Jashtëm iranian, Abbas Araghchi, gjatë një deklarate për mediat në Kombet e Bashkuara, theksoi se tashmë fati i këtij nyjeje detare varet tërësisht nga vullneti i Uashingtonit. Sipas Araghchi-t, nëse plotësohen kërkesat e parashtruara, lëvizja e lirë e anijeve mund të rikthehet brenda një harku kohor prej një jave. Kryediplomati iranian nënvizoi se masat e kërkuara nga pala amerikane nuk përfaqësojnë kërkesa të reja, por janë të bazuara në Memorandumin e Mirëkuptimit të nënshkruar mes dy vendeve në qershor. Nga ana tjetër, burime zyrtare iraniane kanë bërë të qartë se ky propozim nuk ndërlidhet me programin bërthamor të vendit. Teherani insiston se Ngushtica e Hormuzit do të mbetet e mbyllur përderisa SHBA-ja nuk përmbush kushtet e plota, të cilat përfshijnë përfundimin e armiqësive në të gjitha frontet – përfshirë Libanin – brenda shtatë ditëve. Kërkesat e Iranit përfshijnë gjithashtu heqjen e bllokadës mbi portet iraniane, shfuqizimin e sanksioneve ndaj naftës dhe zhbllokimin e aseteve financiare të ngrira. Ky propozim vjen në një periudhë tejet të ndjeshme për Lindjen e Mesme, pas shtatë muajsh tensionesh të larta dhe përshkallëzimit të sulmeve me raketa e dronë nga rebelët Huthi në drejtim të Arabisë Saudite.