Enver Hasani: Zgjedhja e presidentit është legjitime, tejkalimi i minutave nuk cenon Kushtetutën

Ish-kryetari i Gjykatës Kushtetuese, Enver Hasani, ka vlerësuar se tejkalimi i afatit kohor gjatë procesit të zgjedhjes së presidentit të vendit nuk paraqet shkelje të Kushtetutës, përderisa vetë procesi i votimit ka filluar brenda kornizës së përcaktuar ligjore. Sipas Hasanit, thelbi qëndron në nisjen e votimit me kohë, ndërsa vonesat e mundshme gjatë numërimit apo shpalljes zyrtare të rezultateve, edhe nëse ndodhin disa minuta pas afatit, nuk përbëjnë ndonjë problematikë me karakter kushtetues. "Për mua, e rëndësishme është që procesi të ketë filluar në kohën e duhur. Nëse numërimi dhe finalizimi i rezultatit zgjasin pak minuta më tepër, kjo nuk cenon integritetin kushtetues të procedurës", ka sqaruar ai. Lidhur me spekulimet për shpërndarjen e mundshme të legjislativit, Hasani ka qenë kategorik se një gjë e tillë nuk mund të ndodhë automatikisht vetëm nga kalimi i afatit. Ai ka bërë të ditur se për shpërndarjen e Kuvendit kërkohet patjetër një dekret zyrtar. "Kuvendi mbetet fuqiplotë dhe nuk ka asnjë mangësi kushtetuese në këtë drejtim", shtoi ish-kreu i Kushtetueses. Në përfundim, Hasani e ka konsideruar si një sukses për shtetin zgjedhjen e presidentit, qoftë edhe pas datës 6 tetor. Ai e ka përshëndetur këtë zhvillim si një fitore për stabilitetin institucional të Kosovës, duke theksuar se vendi më në fund është bërë me institucione të kompletuara dhe me mandat të plotë kushtetues.