Asllani rrëfen emocionet e fitores dhe momentin e penalltisë: Më erdhi ndërmend gabimi në Serie A

Mesfushori i Kombëtares shqiptare, Kristjan Asllani, ka qenë protagonist i fitores së vështirë 2-1 ndaj San Marinos në stadiumin “Air Albania”, duke i dhuruar kuqezinjve tri pikë jetike që i mbajnë ata në krye të grupit. Duke analizuar rrjedhën e ndeshjes, Asllani pranoi se skuadra pati luhatje të pashpjegueshme pas pjesës së parë. “Hymë mirë në lojë dhe gjetëm golin, por kur nuk i mbyll ndeshjet, vështirësitë bëhen të pashmangshme. Në pjesën e dytë patëm probleme me distancat mes reparteve dhe presingun në mesfushë. Megjithatë, ajo që ka rëndësi është marrja e tri pikëve dhe ruajtja e kreut përpara sfidave vendimtare të nëntorit”, deklaroi ai. Lojtari shpjegoi edhe vështirësitë taktike gjatë takimit, duke theksuar se mesfushorët duhet të jenë më aktivë në qarkullimin e topit. Ai nënvizoi se futbolli modern ka ndryshuar dhe nuk ka më ndeshje të lehta, duke sjellë si shembull edhe përballjen e mëparshme në Finlandë. “Pavarësisht mendimeve të jashtme, asnjë fitore nuk është e thjeshtë. Ne po zbatojmë kërkesat e trajnerit dhe po përshtatemi me ciklin e ri, i cili po na sjell rezultate pozitive”, shtoi Asllani. Momenti më delikat i ndeshjes ishte ekzekutimi i penalltisë, ku Asllani rrëfeu se ndjeu një ngjashmëri me një episod të hidhur në kampionatin italian. “Kur u nisa për te penalltia, përjetova një ‘deja vu’. Më shkoi mendja te ndeshja Leçe-Torino, ku gabova në minutën e 93-të. Isha i lodhur dhe kisha dyshime, pasi nuk kam eksperiencë të madhe në ekzekutimin e 11-metërshave. Gjithsesi, unë studioj lëvizjet e portierit dhe pres hapin e tij të parë, por disa sekrete preferoj t'i mbaj për vete”, u shpreh ai me humor. Në përmbyllje, Asllani shprehu optimizëm për të ardhmen e Kombëtares, duke theksuar se fati është në duart e tyre. “Tani kthehemi te ekipet tona për t’u rikthyer më pas në grumbullim. Jemi shumë të lumtur që kemi kuptuar filozofinë e trajnerit të ri. Kemi zhvilluar katër ndeshje mjaft të mira dhe ky është një hap i madh për Kombëtaren tonë”, përfundoi mesfushori kuqezi.