Vjosa Osmani shpjegon arsyet e mospjesëmarrjes në votimin për presidenten e re

Deputetja e Kuvendit të Kosovës, Vjosa Osmani, ka sqaruar qëndrimin e saj dhe të grupit të deputetëve që e mbështesin, lidhur me mospjesëmarrjen në votimin për zgjedhjen e Justina Shiroka Pulës në postin e presidentes së vendit. Sipas Osmanit, ky vendim ka ardhur si pasojë e përkrahjes së tyre për një kandidat tjetër, Bekim Sejdiun. Ajo theksoi se Shiroka Pula nuk ka qenë pjesë e ndonjë marrëveshjeje politike të mëhershme, duke shtuar se pozicioni i partisë së saj ishte i prerë për të votuar ekskluzivisht kandidatin e tyre. “Ne kemi pasur kandidatin tonë, Bekim Sejdiu. Kandidatja e sotme nuk ka qenë pjesë e marrëveshjes tonë politike dhe kemi pasur pozicion të partisë sonë që të votojmë vetëm kandidatin tonë”, deklaroi Osmani. Megjithatë, deputetja nënvizoi se ky qëndrim nuk e zbeh respektin e tyre ndaj institucioneve të shtetit. Ajo i uroi sukses presidentes së sapozgjedhur, duke shprehur shpresën se zgjedhja e saj do të sjellë stabilitetin e nevojshëm institucional në vend. Në përmbyllje, Osmani bëri të ditur se angazhimi i tyre politik do të vazhdojë nga pozita e opozitës, ku do të jenë të përkushtuar në kundërshtimin e çdo nisme apo çështjeje që, sipas tyre, bie ndesh me interesat kombëtare të Republikës së Kosovës.