E vërteta e bujshme: Cristiano Ronaldo zbardh arsyet e largimit nga Portugalia dhe jep vendimin përfundimtar për të ardhmen

Ylli i kombëtares portugeze, Cristiano Ronaldo, ka thyer heshtjen përmes një njoftimi të gjerë në rrjetet sociale, duke sqaruar situatën e tensionuar që çoi në largimin e tij nga grumbullimi i fundit i luzitanëve dhe duke dhënë një mesazh të qartë për fatin e tij me fanellën e përfaqësueses. Pavarësisht krizës dhe polemikave, sulmuesi ka qetësuar tifozët duke konfirmuar prerazi se nuk ka ndërmend të tërhiqet nga Kombëtarja dhe se do të jetë sërish i gatshëm sapo të kalojë pezullimin. Në rrëfimin e tij të gjatë, 41-vjeçari është shprehur: "Siç premtova, dua të shpjegoj drejtpërdrejt se çfarë ndodhi në kampin e fundit të ekipit kombëtar. Pas Kupës së Botës, Presidenti i FPF-së këmbënguli që ta rishqyrtoja largimin dhe kërkoi mendimin tim për trajnerin aktual. Thashë se ai do të ishte zgjedhja e duhur".⠀"Në gusht, trajneri më tha se isha thelbësor për projektin e tij: Do të luaja ndeshjet e para dhe të fundit. Ai sugjeroi që të anashkaloja udhëtimet jashtë fushe, por unë refuzova: një kapiten nuk rri në shtëpi. Simão Coutinho e pa këtë”. Duke hyrë në detajet e incidenteve, ai ka shtuar: "Ditën e ndeshjes me Norvegjinë, ai më pyeti nëse isha gati të luaja 30 minuta. Nuk ishte në plan, por unë thashë po. U ngroha nga pjesa e parë dhe nuk më thirrën kurrë. Ai e kishte thyer fjalën. Mospërshëndetja e tifozëve më pas ishte faji im dhe kërkoj ndjesë". Në vijim të deklaratës, Ronaldo ka shpjeguar prapaskenat e komunikimit me stafin: "48 orë më vonë, me praninë e Coutinhos, ramë dakord që ai do të thoshte të vërtetën në sallën e shtypit: plani ishte i tij, unë kurrë nuk kërkova minuta dhe të më bënte të ngrohesha pa luajtur ishte një gabim. Ai më kërkoi një përqafim dhe premtoi. Unë miratova një dokument të shkurtër me ato shënime". Megjithatë, situata mori një kthesë të papritur: "Atë mëngjes i kisha thënë Presidentit dhe trajnerit: nëse nuk më doni, thjesht më thoni. Të dy thanë jo. Konferenca për shtyp nuk kishte të bënte fare me atë që ramë dakord. Dëgjova një agresion që nuk e meritoja. Ishte hera e dytë që ai e shkeli fjalën". Në mbyllje të mesazhit të tij, kapiteni portugez ka theksuar rëndësinë e parimeve dhe përkushtimit ndaj shtetit: "Në pothuajse 25 vjet nuk kam ndërhyrë kurrë në një vendim teknik”. Por kur fjala ime thyhet, vendi im nuk është aty. U kërkoj falje shokëve të ekipit që u largova. Përgjegjësia është vetëm e imja. FPF duhet të më ndëshkojë pa asnjë rrethanë lehtësuese; si kapiten, ky është një faktor rëndues". Ai gjithashtu iu përgjigj zërave për një ndeshje lamtumire: "Flitet për ndeshje lamtumire. Por mësova, kur isha i uritur, se askush nuk i jep asgjë askujt. Ekipi kombëtar, për mua, do të thotë të garosh. Kur vdiq babai im, qëndrova deri në mbarimin e ndeshjes tjetër. E bëra këtë për vendin tim”. Në fund, lojtari ka dhënë garancinë e plotë për të ardhmen: "Nëse jam në formë të mirë, pas pezullimit tim, do të jem i disponueshëm, si gjithmonë, për të garuar dhe për të fituar për Portugalinë. Kjo është e vërteta absolute”.