Tensionet në rritje te Real Madridi: Sjellja e Kylian Mbappe trazim në klub

Ylli francez Kylian Mbappe është vënë sërish në qendër të vëmendjes, por kësaj radhe për shkak të një klime dyshimi që po krijohet rreth tij brenda kampit të Real Madridit. Sulmuesi kishte anuluar angazhimet me kombëtaren e Francës për shkak të një shqetësimi në gju, mirëpo prania e tij në Paris gjatë fazës së rikuperimit ka ngritur pikëpyetje serioze lidhur me përkushtimin ndaj klubit dhe mënyrën se si po menaxhohet gjendja e tij fizike. Madje, shqetësimi brenda radhëve të “Los Blancos” është thelluar edhe më shumë pas disa veprimeve të fundit të lojtarit, përfshirë shfaqjen e tij duke ngarë biçikletën dhe një vonesë të regjistruar në seancën stërvitore në kompleksin “Valdebebas”. Lidhur me këtë situatë, gazetari i njohur Anton Meana, gjatë paraqitjes së tij në emisionin “El Larguero” të “Cadena SER”, ka bërë të ditur se mes sulmuesit dhe klubit mbretëror ekziston një “krizë besimi mjekësor”. Sipas tij, lojtari shpesh jep përshtypjen se “dëshiron të jetë diku tjetër”, pasi duket se nuk ka besim të plotë te departamenti mjekësor i klubit spanjoll. Kjo nuk përbën rastin e parë që regjistrohet një ftohje e tillë në raportet mes lojtarit dhe stafit shëndetësor të Real Madridit, megjithatë zhvillimet e fundit dëshmojnë se situata ka marrë përmasa më të ndjeshme.