Mickoski refuzon nismën e LSDM-së për pagën minimale, s’ka ndërhyrje shtetërore pa dialog social

Kryeministri i Republikës së Maqedonisë së Veriut, Hristijan Mickoski, ka shprehur qëndrimin e tij se ndonëse mbështet idenë e rritjes së të ardhurave për qytetarët, ai nuk do t'i japë mbështetje projektligjit të propozuar nga opozita për vendosjen e pagës minimale në vlerën e 600 eurove. Në një prononcim për mediat, kreu i ekzekutivit maqedonas e cilësoi këtë nismë si një lëvizje nga ana e një opozite që, sipas tij, ka shkatërruar vendin në të kaluarën. "Opozita, e cila nuk ka kredibilitet, as publik dhe as politik, dhe e cila është e bllokuar në kënetën e vet politike, dhe mendoj se do të jetë në margjinat e skenës politike për një kohë të gjatë", u shpreh ndër të tjera kreu i Qeverisë. Sipas Mickoskit, shteti nuk duhet të imponojë vendime të tilla, por rritja e të ardhurave duhet të jetë frut i bisedimeve dhe marrëveshjeve mes sindikatave të punëtorëve dhe komunitetit të bizneseve. "Përndryshe, po, unë jam për rritjen e pagës minimale, po, unë jam për rritjen pagave dhe dua që të ketë paga më të larta, por edhe ky proces duhet të zhvillohet në kuadër të dialogut social midis punëtorëve dhe punëdhënësve", përfundoi kryeministri Mickoski.