Tragjedi në Stamboll: 15-vjeçari sulmon me thikë shkollën e mesme, humb jetën një nxënës dhe plagosen tetë të tjerë

Një ngjarje e rëndë ka tronditur Turqinë, pasi një adoleshent 15-vjeçar ka ndërmarrë një sulm me thikë brenda një shkolle të mesme në lagjen Başakşehir të Stambollit, duke lënë të vdekur një nxënës dhe duke plagosur tetë të tjerë. Krimi makabër u regjistrua mëngjesin e së martës. Sipas deklaratave të Ministrit të Arsimit, Yusuf Tekin, agresori kishte veshur një uniformë shkolle për t'u fshehur para se të sulmonte në ambientet e Shkollës së Mesme Şeyh Şamil Imam Hatip, e cila ndodhet në zonën Başakşehir të metropolit turk. Autoritetet vendore njoftuan se incidenti ka ndodhur rreth orës 08:35 me kohën lokale (07:35 CEST). Policia ka arritur të vërë në pranga autorin e dyshuar, i cili rezulton të jetë një nxënës i klasës së dhjetë që studion në një institucion tjetër arsimor. Ministri i Shëndetësisë, Kemal Memişoğlu, bëri të ditur se tetë nxënës morën lëndime, prej të cilëve njëri ndodhet në gjendje kritike për jetën, ndërsa dy të tjerë janë në gjendje nga e moderuar deri te e rëndë. "Trajtimi mjekësor i tetë të plagosurve tanë po vazhdon në spitalet tona dhe ne po e ndjekim nga afër ecurinë e shëndetit të tyre", u shpreh ai, ndërsa ministri Tekin konfirmoi ndërkohë humbjen e jetës së njërit prej nxënësve. Si pasojë e kësaj tragjedie, procesi Mësimor në këtë shkollë është pezulluar për ditët e martë dhe të mërkurë. Në lidhje me ngjarjen, Gjykata e 3-të Penale e Paqes e Stambollit ka vendosur një ndalim zyrtar transmetimi për mbulimin mediatik të incidentit. Këshilli i Rregullimit të Medias në Turqi, RTÜK, arsyetoi se kjo masë është marrë për të ruajtur integritetin e hetimeve dhe për të garantuar kapjen e të dyshuarve. Institucionet arsimore Imam-hatip janë shkolla të mesme me orientim fetar që financohen nga shteti, të konceptuara fillimisht për përgatitjen e imamëve dhe drejtuesve të faljeve. Gjatë udhëheqjes së Presidentit Rexhep Tajip Erdogan, këto shkolla kanë shënuar një rritje të ndjeshme të numrit të nxënësve në mbarë vendin. Ndërkohë që kritikët kanë ngritur shqetësimin se ky zgjerim është bërë në dëm të arsimit laik, autoritetet theksojnë se deri më tani nuk ka asnjë shenjë apo tregues se ky sulm tragjik mund të ketë pasur prapavijë politike apo ideologjike.