Shtohen shqetësimet në Rusi: Dyshime për viktimën e dytë nga murtaja në zonën e karantinës në Siberi

Burimet mediatike në Rusi kanë njoftuar se një tjetër jetë mund të jetë shuar si pasojë e murtajës brenda një njësie spitalore në rajonin e Irkutskut. Ngjarja vjen menjëherë pas humbjes tragjike të jetës së një punonjësi 28-vjeçar, i cili shërbente në një laborator ku kryheshin kërkime mbi këtë patogjen. Megjithatë, burimet ndërkombëtare bëjnë me dije se ky raportim për viktimën e dytë nuk ka marrë ende një konfirmim zyrtar nga strukturat shtetërore. Rasti i parë fatal u shënua më 2 tetor, kur teknikja e laboratorit, Daria Sipilova, e cila punonte në Institutin Kundër Murtajës në Irkutsk, ndërroi jetë në një institucion shëndetësor në qytetin Selekhov. Sipas të dhënave të bëra publike në vendin ngjarjes, ajo u kishte deklaruar bluzave të bardha se më 25 shtator kishte thyer pa dashje një enë qelqi që mbante baktere aktive të kësaj sëmundjeje të rëndë. Në krahun tjetër, ky skenar nuk gjen mbështetje te autoritetet zyrtare, të cilat këmbëngulin se në ambientet e institutit nuk ka ndodhur asnjë incident me mikroorganizma të rrezikshëm. Si masë paraprake pas humbjes së jetës së teknikës, afërsisht 197 individë që kishin pasur kontakte me të u vendosën nën mbikëqyrje të rreptë mjekësore, ndërsa disa spitale në Irkutsk kaluan në regjim karantine për një periudhë trejavore.