Vrasja makabre e shqiptarit në Torino: Zbardhet plani djallëzor i bashkëshortes dhe të dashurit të saj

Autoritetet italiane kanë hedhur dritë mbi dinamikën dhe motivet e ekzekutimit brutal të 55-vjeçarit shqiptar, Mikel Rroku, ngjarje kjo e regjistruar në qytetin e Torinos. Sipas hetimeve të deritanishme, bashkëshortja e viktimës dhe partneri i saj i ri kanë thurur një plan të mirëmenduar për ta eliminuar, me qëllim që t'i jepnin fund martesës dhe t'i hapnin rrugë lidhjes së tyre romantike, si dhe për të vënë dorë mbi banesën sociale ku banonte bashkëshorti. Operacioni i Karabinierëve të Komandës Provinciale të Torinos, i zhvilluar në agimin e datës 6 tetor, rezultoi në prangosjen e dy të dyshuarve, një gruaje 45-vjeçare dhe një burri 52-vjeçar. Aktualisht, ata ndodhen pas hekurave në kuadër të masës së sigurisë, duke u ballafaquar me akuzat e rënda për vrasje të paramenduar. Nga provat e grumbulluara, rezulton se ideja kriminale për zhdukjen e 55-vjeçarit kishte nisur të merrte jetë që prej muajit maj. Hetuesit bëjnë me dije se çifti kishte shqyrtuar skenarë të ndryshëm për jetën e Rrokut, duke përfshirë helmimin apo përdorimin e armëve të ftohta si thika, para se të vendosnin përfundimisht për mënyrën e ekzekutimit. Ngjarja tragjike dyshohet se është konsumuar më 30 qershor, brenda apartamentit të viktimës të ndodhur në rrugën Verolengo, në zonën Lucento të Torinos. Rekonstruksioni i ngjarjes tregon se shqiptari është goditur pabesisht nga pas dhe është sulmuar vazhdimisht edhe pasi kishte përfunduar i shtrirë në tokë. Raporti mjeko-ligjor konfirmoi se trauma fatale në kokë ishte shkaktuar nga goditjet me një mjet të fortë, konkretisht me çekiç. Trupi i pajetë i 55-vjeçarit u zbulua vetëm më 6 korrik, gjashtë ditë pas data e dyshuar e krimit. Ai u gjet në gjendje të avancuar dekompozimi në banesën e tij të vendosur në katin e dytë të një pallati social, pasi fqinjët, të shqetësuar nga era e rëndë që përhapej nga apartamenti, kishin sinjalizuar organet kompetente. Megjithëse fillimisht shkaqet e vdekjes paraqiteshin të mjegullta, plagët e rënda në kokë orientuan hetimet drejt pistës së krimit me dashje. Çështja iu besua Njësisë Hetimore të Karabinierëve të Torinos, ndërsa veprimet proceduriale u koordinuan ngushtë nga Prokuroria e qytetit. Një tjetër provë e fortë që ka ngritur dyshimet e organit të akuzës është sjellja e dyshimtë e çiftit në periudhën pas krimit. Hetuesit zbuluan se ata kishin bërë kërkime të detajuara për mundësitë e largimit nga Italia drejt vendeve të Amerikës Veriore, përfshirë shtete me të cilat Italia nuk ka lidhur marrëveshje ekstradimi. Sipas autoriteteve, këto veprime dëshmojnë qartë se të dyshuarit kishin përgatitur terrenin për t'i shpëtuar drejtësisë përmes arratisjes. Ndërkohë, grupi hetimor vijon punën intensive për të saktësuar rolin e secilit prej tyre në këtë ngjarje të rëndë.