Alarmi nga Kievi: Zelensky paralajmëron përgatitje për një sulm të ri masiv nga Rusia

Presidenti i Ukrainës, Volodymyr Zelensky, ka bërë të ditur se vendi po bëhet gati për një ofensivë të re të mundshme në shkallë të gjerë nga forcat ruse. Pas një serie konsultimesh me zyrtarë të lartë të qeverisë, strukturave ushtarake dhe agjencive të inteligjencës, kreu i shtetit ukrainas konfirmoi se autoritetet kanë siguruar të dhëna të reja nga shërbimet sekrete mbi lëvizjet e Moskës dhe tashmë kanë nisur zbatimin e masave mbrojtëse. "Kemi marrë informacione të reja të inteligjencës lidhur me përgatitjet ruse për një goditje masive. Po përgatisim masa kundërvepruese. Kemi caktuar afate për shumicën e detyrave dhe ato me prioritetin më të lartë tashmë po zbatohen", shkroi Zelensky në platformën X. Gjithashtu, kreu i shtetit ukrainas theksoi se përfaqësuesit qeveritarë, në bashkëpunim të ngushtë me administratat rajonale, kanë përgatitur plane shtesë në fushën e logjistikës. Këto masa kanë për qëllim kryesor minimizimin e dëmeve nga sulmet e njëpasnjëshme ruse ndaj rrjetit të transportit dhe nyjave të furnizimit, të cilat kanë përfunduar sërish në shënjestër gjatë ditëve të fundit. Më herët, në fund të muajit shtator, Rusia ndërmori një sulm të fuqishëm kundër Kievit dhe rajoneve përreth, duke hedhur në fushë afër 190 dronë luftarakë dhe raketa balistike. Atë kohë, Zelensky bëri me dijen se shënjstra kryesore e Moskës ishte sistemi energjetik i kryeqytetit dhe zonës përqark, ndërkohë që goditje pati edhe në rajone të tjera të shtetit ukrainas. Gjatë periudhës së fundit, ushtria ruse ka intensifikuar gjithashtu goditjet ndaj infrastrukturës transportuese, duke vënë në shënjestër ura dhe nyja vitale për vijën e furnizimit të Ukrainës. Sipas autoriteteve në Kiev, qëllimi i Kremlinit është të paralizojë dërgesat për qytetet dhe vijën e frontit, si dhe të shtojë trysninë mbi sistemin e energjisë në prag të stinës së dimrit. Në anën tjetër, Ukraina vijon operacionet e kundërpërgjigjes, duke shënjestruar rafineritë e naftës, pikat e magazinimit të karburantit dhe bazat e lëshimit të dronëve në territorin rus. Zelensky ka theksuar në të kaluarën se Kievi do t'i kthejë përgjigje sulmeve ruse ndaj infrastrukturës kritike, por pa marrë kurrë si shënjestër popullsinë civile.