Kundërpërgjigjja e Hamzës ndaj Kurtit: Siguro 29 deputetë në sallë dhe le të votojnë si të duan

Kryetari i Partisë Demokratike të Kosovës (PDK), Bedri Hamza, i është kundërpërgjigjur kryeministrit në detyrë, Albin Kurti, menjëherë pas daljes së këtij të fundit në konferencë për media, duke i paraqitur një propozim të ri lidhur me miratimin e ndryshimeve në Ligjin për Dhomat e Specializuara. Gjatë fjalës së tij, Hamza u shpreh se qëndrimi i subjektit që ai drejton ka qenë gjithmonë i qëndrueshëm dhe se votimi i këtij ligji në dy lexime nuk ndërlidhet me asnjë lloj pazari politik apo institucional. Ai shtoi se çështja e zgjedhjes së presidentit thjesht ka rastisur të përkojë me këtë periudhë, ndërsa nuk la pa përmendur kritikat për zvarritjen e konstituimit të Kuvendit dhe zgjedhjes së kreut të shtetit. “Unë jam mirënjohës, i falënderoj të gjithë deputetët e Kuvendit që kanë votuar pro deklaratës. Askund në deklaratë nuk shkruan për PDK-në. Unë konsideroj që nuk duhet që veç PDK-ja të flasë për një luftë të drejtë, të imponuar, çlirimtare, për liri dhe pavarësi. Duhet edhe partitë e tjera”, u shpreh Hamza, duke theksuar se nismat ligjore synojnë drejtësi për ish-krerët e Ushtrisë Çlirimtare të Kosovës që poballafaqohen me drejtësinë në Hagë. “Ligji kërkon drejtësi për njerëzit që janë në këtë proces. Drejtësi për Hashim Thaçin, Kadri Veselin, Jakup Krasniqin e Rexhep Selimin. Nuk janë atje si ndonjë pjesëtar i ndonjë subjekti politik. Janë për pjesën më të ndritshme të historisë së Kosovës, luftës çlirimtare të Kosovës”, shtoi ai. Duke folur për ftesat për takime me kreun e ekzekutivit, Hamza sqaroi se PDK-ja nuk u është shmangur asnjëherë bisedimeve, mirëpo nuk sheh arsye për të mbajtur takime serike që nuk prodhojnë asnjë rezultat të kéq-përkufizuar apo konkret. “Nuk ju kom ikë takimeve, mirëpo nuk mundemi me bë seri me shumë epizoda pa rezultat. Ne jemi në orët e fundit”, tha ai. Lidhur me pretendimet se shmangia e procedurave kërkon domosdoshmërisht një afat prej 72 orësh, lideri i opozitës e quajti këtë të pavërtetë nga ana juridike, duke kujtuar se PDK-ja i është referuar nenit 123 dhe jo procedurës së përshpejtuar. Ai gjithashtu e cilësoi si përpjekje për “shitje mjegulle” marrëveshjen e arritur për kandidaturën e Blerim Sejdiut për president, duke theksuar se ajo nuk ka të bëjë fare me PDK-në. Në fund të adresimit të tij, Hamza iu kundërvë drejtpërdrejt ofertës së Kurtit, duke vënë kusht që grupi parlamentar i Lëvizjes Vetëvendosje të bëjë kuorumin e nevojshëm në sallë. “Atëherë edhe unë po t’i kërkoj ty 29, po. 29 deputetë. Sjelli në sallë, qysh të dojnë le të votojnë. Po nuk shkon kështu. Nëse doni me e bë Ligjin, sjelli 29 deputetë në sallë”, përfundoi ai.