Zgjidhja për presidentin, Murati: Kurti dhe Abdixhiku bindin Sejdiun nëse Hamza thotë ‘po’

Ministri i Financave, Hekuran Murati, ka reaguar ashpër ndaj zhvillimeve rreth zgjedhjes së presidentit të vendit, pas vendimit të Bekim Sejdiut për t'u tërhequr përfundimisht nga kjo garë. Sipas Muratit, disa media kanë nxituar të raportojnë largimin e Sejdiut pa pritur më parë një reagim zyrtar nga ana e kryetarit të Partisë Demokratike të Kosovës (PDK), Bedri Hamza, lidhur me atë që ai e ka cilësuar si një ofertë të re nga kryeministri Albin Kurti. “Disa medie u nxituan që ta rikonfirmojnë tërheqjen e Prof. Bekim Sejdiut për President të Republikës në vend se ta marrin përgjigjen nga kryetari i PDK-së, Bedri Hamza, për ofertën e re të Kryeministrit Kurti: edhe me vetëm gjysmën e grupit parlamentar të PDK-së që e votojnë qoftë edhe kundër Bekim Sejdiun për President, ne i japim votat tona për Projektligjin mbi Gjykatën Speciale në lexim të dytë”, ka shkruar Murati në rrjetet sociale. Ai u ka bërë thirrje gazetarëve që të drejtohen te kreu i PDK-së për të marrë një qëndrim zyrtar, duke shtuar se nëse Hamza jep dritën jeshile, atëherë krerët e ekzekutivit dhe të opozitës mund të ndërhyjnë për ta bindur Sejdiun që të kthehet në garë, me qëllim shmangien e zgjedhjeve të parakohshme. Reagimi i ministrit vjen pasi vetë Bekim Sejdiu konfirmoi sërish se nuk është më pjesë e garës për kreun e shtetit, pavarësisht insistimit të kryeministrit Kurti se emri i tij mbetet në tavolinë, në bazë të dakordësimeve të mëparshme politike me Lidhjen Demokratike të Kosovës (LDK). “I kam njoftuar sërish LDK-në dhe Kurtin, jam tërhequr nga gara”, ka deklaruar shkurtimisht Sejdiu. Nga ana e tij, shefi i qeverisë, Albin Kurti, ka përsëritur se PDK-ja mjafton të sigurojë praninë e të paktën gjysmës së deputetëve të saj në seancë, duke theksuar se ligjvënësit mund të votojnë edhe kundër kandidaturës së propozuar nga Lëvizja Vetëvendosje. “Nëse duan zgjidhje, ajo ekziston dhe duhet të gjendet përmes takimit. Kërkojmë nga PDK-ja të zotohet se mund të na sjellë në seancë gjysmën e grupit parlamentar. Edhe kundër le të votojnë për Bekim Sejdiun”, ka pohuar Kurti.