Ndarja e re territoriale, Boçi: Rama po përsërit skenarin e 2014-ës, projekti i mazhorancës po boshatis Shqipërinë

I ftuar në emisionin “Minuta e Parë” në News24, deputeti i Partisë Demokratike, Luçiano Boçi, ka analizuar projektligjin e Partisë Socialiste për reformën territoriale, i cili pritet të kalojë për votim në Kuvend gjatë seancës së kësaj të enjteje. Boçi, i cili mban edhe detyrën e bashkëkryetarit të komisionit të posaçëm për këtë reformë, u shpreh se socialistët janë gati të miratojnë një nismë që, sipas tij, do të përshpejtojë ritmet e shpopullimit të vendit. “Kjo dëshmon qartë se bëhet fjalë për një vendim politik, që ishte i paralajmëruar që në nisje të komisionit dhe u konfirmua nga sjellja e mazhorancës, si dhe nga projektligji i dorëzuar nga një grup deputetësh që thjesht kanë copëtuar hartën në vend që të bëjnë reformë. Një reformë e vërtetë nënkupton organizimin dhe funksionimin e pushtetit vendor. Në thelb, kjo është një përsëritje e modelit të vitit 2014, gjë që e ka pranuar vetë kryeministri Rama,” u shpreh ai gjatë bisedës në studio. Sipas deputetit demokrat, Rama që në vitin 2014 synonte krijimin e 46 deri në 47 bashkive, por ndërhyrja e një partie aleate solli shtimin e 15 njësive të tjera. Ai theksoi se mungesa e reflektimit ndaj pasojave të së kaluarës ka prodhuar krizën aktuale të shpopullimit, e cila shoqërohet me mungesë të theksuar shërbimesh dhe me distancimin e qytetarëve nga institucionet vendore. “Lëvizjet e brendshme të popullsisë janë modeste, ndërsa ajo jashtë kufijve shkon në nivelet 80-90%. Vetëm Tirana shënon një rritje prej 15 mijë banorësh, ndërkohë që qarqet e tjera kanë pësuar rënie drastike. Shqiptarët po ikin jashtë shtetit për shkak të mungesës së shërbimeve. Ky fenomen ka prekur si zonat rurale, ashtu edhe ato urbane. Pakënaqësia buron nga mungesa dhe distanca e madhe e shërbimeve, të cilat kur ofrohen, janë në standarde shumë të ulëta. Nëse qeveria mendon se mund të ndërtojë një ‘Zvicër’ imagjinare, ku qytetarët migrojnë vetëm brenda vendit, kemi të dojmë me një vetëkënaqësi absurde ose me një mashtrim të pastër publik, që përdoret nga Rama për t'u justifikuar,” shtoi Boçi. Në mbyllje të fjalës së tij, lidhur me reagimin e opozitës, ai sqaroi se ndonëse PD-ja do të dëshironte të ndërmerrte hapa më të fortë si në protestat antiqeveritare, aktualisht protestat po organizohen me nismë të mirëfilltë qytetare. Ndërkohë, sipas tij, Partia Demokratike ka intensifikuar komunikimin dhe ka ndërmarrë hapa konkretë përmes peticioneve në bashkëpunim të ngushtë me këshillat bashkiakë.