Kurti hedh dritë mbi tërheqjen e Bekim Sejdiut: Me mbi 80 vota nuk do të kishte refuzim

Kryeministri i vendit, Albin Kurti, ka theksuar se Partia Demokratike e Kosovës duhet të reflektojë përmes votës së saj në Kuvend, duke kërkuar njëkohësisht mbështetjen e këtij subjekti për çështjen e zgjedhjes së presidentit në këmbim të votave të Lëvizjes Vetëvendosje për Ligjin e Gjykatës Speciale. Gjatë një deklarate për media, kreu i ekzekutivit u ndal tek tërheqja e kandidaturës së Bekim Sejdiut për postin e të parit të shtetit, duke u shprehur i bindur se ai nuk do të kishte hezituar të jepte kontributin e tij nëse numrat në parlament do të ishin më të sigurt. “Nëse PDK është kundër, le ta shprehë këtë qëndrim me votë në sallë; le të votojnë kundër ose të abstenojnë, por e rëndësishme është të jenë të pranishëm. Profesor Sejdiu doli hapur me ne në konferencë dhe ishte i gatshëm të merrte përsipër këtë përgjegjësi. Në një situatë të tillë konsensusi, vështirë se ai do të refuzonte të ishte pjesë e përpjekjes për t'i kursyer vendit zgjedhje të reja të panevojshme”, u shpreh Kurti. Më tej, kryeministri sqaroi se vendimi për t'u tërhequr erdhi si pasojë e rënies së mbështetjes numerike, nga 80 deputetë në 74 të tillë, duke bërë që i gjithë projekti të bëhej i brishtë. “Ai pranoi të përfshihej në këtë proces kur mbështetja ishte në kufirin e 80 votave, ku mjaftonte mungesa e një deputeti që gjithçka të dështonte. Por po të kishim siguruar një mbështetje të re prej mbi 80 votash, jam i sigurt se ai nuk do të thoshte kurrë që vendi të shkojë në zgjedhje ndërkohë që numrat tashmë ishin arritur”, shtoi ai. Në fund, Kurti i drejtoi një thirrje publike përfaqësuesve të opozitës, veçanërisht Bedri Hamzës, duke kërkuar një angazhim konkret se të paktën gjysma e grupit parlamentar të PDK-së do të marrë pjesë në seancë, gjë që sipas tij do t'i hapte rrugë menjëherë përmbylljes së leximit të dytë të ligjit nga ana e tyre.