Gucati i ashpër ndaj Kurtit: Po manipulon me Gjykatën Speciale dhe çështjen e presidentit

Kryetari i Organizatës së Veteranëve të Luftës së UÇK-së, Hysni Gucati, ka shpërthyer në kritika ndaj kryeministrit Albin Kurti, lidhur me kushtëzimin e votimit të projektligjit për Gjykatën Speciale me zgjedhjen e presidentit të vendit. Sipas Gucatit, një qasje e tillë e kreut të ekzekutivit dëshmon qartë se synimi i tij i vetëm është dërgimi i vendit drejt zgjedhjeve të reja të parakohshme. Duke ironizuar me ftesën e kryeministrit, kreu i OVL-UÇK-së u shpreh se nëse ai tregon kaq shumë gatishmëri, atëherë të dyja çështjet duhet të kalojnë menjëherë në një paketë të vetme. Në fund, Gucati ka theksuar se nuk mund të ketë veprime me kushte apo të ashtuquajtura “veresi”, duke kërkuar që temat e rëndësishme institucionale të trajtohen në bllok dhe pa hile politike.