Pendimi i Gerrard: “Do të kisha qëndruar te Liverpooli sikur ta dija se do vinte Klopp”

Legjenda e fanellës së Liverpoolit, Steven Gerrard, ka pranuar hapur se do të kishte ndryshuar planet për të ardhmen e tij, nëse do të kishte pasur dijeni se Jurgen Klopp do të vishej trajner i skuadrës vetëm pak muaj pas largimit të tij. Gerrard i dha fund aventurës së tij disadekadëshe në “Anfield” gjatë verës së vitit 2015 për të nisur një eksperiencë të re në Shtetet e Bashkuara te LA Galaxy. Megjithatë, vetëm pak muaj më vonë, saktësisht në tetor të po atij viti, strategu gjerman u emërua në krye të klubit anglez, duke bërë që ish-kapiteni të humbasë shansin për të bashkëpunuar me të. Duke reflektuar mbi këtë mundësi të humbur, Gerrard theksoi se do të kishte ndërmarrë hapa krejtësisht të tjerë në karrierën e tij për të qenë pjesë e vizionit të Kloppit. “Do të sakrifikoja shumë gjëra, profesionalisht dhe personalisht, vetëm për të pasur mundësinë të luaja për Kloppin”, u shpreh ai. Në muajt e fundit të qëndrimit te skuadra angleze, ish-mesfushori kishte në tavolinë një propozim për të vazhduar bashkëpunimin edhe për një edicion tjetër. Por, pas diskutimeve me drejtuesit e atëhershëm, ai krijoi përshtypjen se hapësirat e tij në fushë do të ishin tejet të reduktuara. “Më ishte ofruar një kontratë njëvjeçare për të qëndruar edhe një sezon te Liverpooli. Por, nga bisedat që kisha me stafin e klubit në atë kohë, kuptova se do të isha më shumë një lojtar dytësor, me më pak minuta dhe jo aq aktiv sa do të dëshiroja”, tregoi ai. Sipas ish-kapitenit, skenari do të kishte qenë tërësisht ndryshe po të ishte në dijeni të lëvizjeve në stolin e drejtimit. “Nëse do ta dija se Jurgen do të vinte, do të kisha rrezikuar të qëndroja. Do të provoja ta bindja atë dhe ndoshta do të kisha pasur një mundësi në fund të karrierës sime. Fatkeqësisht, mora vendimin për t’u larguar. Tani, duke e parë në retrospektivë, do të kisha qëndruar dhe do ta kisha marrë atë rrezik”, shtoi ai. Nën drejtimin e Jurgen Klopp, Liverpooli hyri në një nga periudhat më të lavdishme të historisë së tij moderne, duke ngritur lart tetë trofe madhorë, ku përfshihen Premier Liga, Liga e Kampionëve dhe FA Cup. Nëse do të kishte zgjedhur të qëndronte, Gerrard do të kishte pasur shansin të shtonte trofe të rëndësishëm në palmaresin e tij, ndonëse në moshën 35-36-vjeçare, kontributi i tij në fushë mbase do të ishte më i orientuar drejt rolit të liderit nga stoli rezervë.