Ndërhyrja e policisë në protesta, Kurti: Rastet janë dorëzuar në IPK, forcat e rendit sot më profesionale

Kryeministri i vendit, Albin Kurti, është prononcuar lidhur me ndërhyrjen e Policisë së Kosovës ndaj protestuesve gjatë mbrëmjes së kaluar, duke bërë të ditur se çështjet që ngrenë dyshime për tejkalim të autorizimeve tashmë i janë referuar Inspektoratit Policor të Kosovës (IPK) për verifikim të mëtejmë. Duke qenë se ka qenë i angazhuar në institucion deri në orët e vona të mesnatës, kreu i ekzekutivit pranoi se nuk i posedon detajet e zhvillimit të protestës apo rrethanat ekzakte që çuan në ndërhyrjen e forcave të rendit. Megjithatë, ai theksoi se institucionet janë të angazhuara për të shqyrtuar çdo sjellje të mundshme të papranueshme nga ana e zyrtarëve policorë. Në një krahasim me të kaluarën, Kurti vlerësoi se qasja e Policisë së Kosovës është dukshëm më e matur dhe në nivel më të lartë profesional krahasuar me kohën kur ai vetë udhëhiqte protestat vite më parë. "Sa i përket protestave, unë mbrëmë, deri pas mesnate, kam qenë këtu në Kuvendin e Republikës. Çdo herë kur janë mbajtur protestat, këtu kam qenë – ose në Kuvend, ose në Qeveri. Asnjëherë nuk kam qenë diku tjetër. Dhe nuk i di hollësitë e protestave, nuk e di se cili është momenti kur policia ndërhyn apo nuk ndërhyn, çfarë bëjnë protestuesit më herët, por e di që tashmë janë dërguar edhe disa raste në Inspektoratin Policor, për të parë nëse ka pasur ndonjë sjellje të tepruar të ndonjë polici. Por, nëse ju i shikoni xhirimet e sjelljes së policëve, tash ka shumë më shumë xhirime se para 15 vjetësh, kur unë i organizoja protestat. E shihni që policia është jashtëzakonisht më tolerante dhe profesionale", u shpreh ai.