Akuza të rënda ndaj pjesëtares së Policisë së Kosovës: Dyshohet se kërcënoi një të mitur dhe dhunoi një invalid lufte

Lirim Mehmeti ka publikuar akuza të ashpra ndaj Marigona Beadinit, e cila identifikohet si pjesëtare e Policisë së Kosovës dhe truprojë e Dejona Mihailit. Sipas pretendimeve të bëra publike, ajo dyshohet se ka kanosur rëndë një të mitur dhe ka përdorur dhunë ndaj një invalidi të luftës gjatë zhvillimit të një proteste. Në denoncimin e bërë, Mehmeti citon fjalët fyese dhe kërcënuese që Beadini dyshohet se ia ka drejtuar 16-vjeçarit A.Q., i cili është edhe nipi i saj. Në raportimet zyrtare të dorëzuara në Policinë e Kosovës dhe në Inspektoratin Policor, thuhet se Beadini, përveç angazhimit si truprojë, shërben edhe si pjesëtare e Njësisë Speciale Operative. Më tej, në reagim thuhet se ajo ka qenë e përfshirë edhe në ngjarjet e mbrëmshme gjatë protestës, ndërsa ngrihen akuza se gjatë protestës ka sulmuar me shkop gome në kokë ish-ushtarin e UÇK-së dhe invalidin e luftës, Gazmend Bytyçi, i cili ishte plagosur në kokë gjatë kohës së luftës. Në përmbyllje të reagimit të tij, Mehmeti ngre dilema rreth përfshirjes së eprorëve apo ndikimit politik në këto raste, duke shtruar gjithashtu pyetjen se si është e mundur që një zyrtare policore që paguhet nga buxheti i shtetit të shërbejë si truprojë private.