Takim urgjent Kurti-Konjufca me Haxhiu, orët e fundit para afatit kushtetues për presidentin

Kryeministri i Kosovës, Albin Kurti, së bashku me kryediplomatin Glauk Konjufca, po zhvillojnë një takim pune me kryeparlamentaren Albulena Haxhiu, për të bashkërenduar hapat e fundit në këtë fazë vendimtare. Kjo mbledhje e nivelit të lartë vjen në prag të skadimit të afatit të caktuar nga Gjykata Kushtetuese për zgjedhjen e kreut të shtetit, duke shtuar tensionin dhe pritshmëritë në skenën politike. Ndërkohë, zyra e kryeministrit ka bërë të ditur se kreu i ekzekutivit do të paraqitet para gazetarëve në orën 15:00 për të mbajtur një konferencë për media. Në anën tjetër, deputetët e subjekteve politike parlamentare janë prezentë në ambientet e Kuvendit, ndërsa deri më tani nuk ka ende një njoftim zyrtar për thirrjen e seancës plenare.