Incidenti me vezë ndaj gazetarit Bledi Mane, Policia e Shtetit nis hetimet dhe jep paralajmërimin e fortë

Lidhur me ngjarjen e ndodhur më 5 tetor në kryeqytet, ku gazetari Bledi Mane u vu në shënjestër të një sulmi nga protestuesit, strukturat blu kanë ndërmarrë të gjitha hapat e nevojshëm proceduralë. Qëllimi është zbardhja e plotë e dinamikës, zbulimi i autorëve të përfshirë dhe dërgimi i dosjes penale në Prokurori për veprime të mëtejshme ligjore. Nëpërmjet një deklarate zyrtare, Policia e Shtetit ka shprehur dënimin e ashpër për çdo formë dhunë, kërcënimi apo presioni ndaj individëve, duke ritheksuar mbrojtjen e së drejtës kushtetuese për tubime paqësore. Megjithatë, institucioni ka qenë i prerë se kjo e drejtë nuk duhet keqpërdorur kurrë për të sulmuar ose intimizuar persona të tjerë për shkak të ideve apo bindjeve të tyre. “Asnjë individ nuk ka të drejtë të vetërgjykohet, të marrë rolin e gjykatësit për të përcaktuar ndëshkimet dhe t'i vërë ato në jetë në rrugë. Përgjegjësia për zbatimin e ligjit i takon ekskluzivisht institucioneve shtetërore”, thuhet ndër të tjera në reagim. Autoritetet u kanë bërë thirrje qytetarëve që të distancohen nga çdo lloj konflikti dhe të mos bien pre e provokimeve për të kthyer dhunën me dhunë. Policia ka ftuar çdo person që ndjen rrezik për sigurinë e tij që të kontaktojë menjëherë strukturat kompetente, duke premtuar se çdo denoncim do të trajtohet me transparencë dhe seriozitet maksimal. Në fund të reagimit, Policia e Shtetit ka theksuar se do të garantojë në mënyrë të barabartë si të drejtën e qytetarëve për të protestuar, ashtu edhe sigurinë e atyre që shprehin mendime ndryshe. Liria e shprehjes dhe mbrojtja e çdo individi mbeten shtylla të patjetërsueshme të garantuara nga ligji.