Goditje rrjetit kriminal: Prokuroria Speciale ngre aktakuzë ndaj gjashtë personave për mashtrime ndërkombëtare

Prokuroria Speciale e Republikës së Kosovës ka finalizuar hetimet dhe ka dorëzuar aktakuzën në Gjykatën Themelore në Prishtinë kundër gjashtë personave të përfshirë në aktivitete të paligjshme. Sipas dokumentit të prokurorisë, të pandehurit B.D., A.D., L.D., G.D. dhe E.D. përballen me akuza të rënda, duke përfshirë pjesëmarrjen dhe organizimin e një grupi kriminal, mashtrimin, si dhe hyrjen e paautorizuar në sisteme kompjuterike. Ndërkaq, ndaj të pandehurit B.C. është ngritur aktakuzë për veprën penale të mashtrimit. Hetimet kanë zbuluar se në periudhën kohore 2022-2024, grupi i përbërë nga B.D., A.D., L.D., G.D. dhe E.D. ka operuar si një organizatë kriminale me shtrirje ndërkombëtare. Nga territori i Kosovës, ata dyshohet se kanë orkestruar veprime kriminale që kishin për objektiv shtetasit e Republikës Federale të Gjermanisë.