Mbappe i jep fitoren Francës në tokën turke, vendasit mbeten me dhjetë lojtarë

Franca e ka nisur me sukses fushatën në Ligën A të Kombeve, duke triumfuar si mysafire përballë Turqisë në stadiumin 'Koçaeli'. Përfaqësuesja franceze siguroi tri pikët e para pas një fitoreje minimale 1:0. Turqia e nisi ndeshjen me këmbëngulje, duke rrezikuar seriozisht portën franceze në dy raste. Në minutat 28 dhe 32, Ferdi Kadioglu provoi të shënonte me kokë, por në të dyja rastet u ndal nga reflekset e shkëlqyera të portierit Mike Maignan. Presioni turk vazhdoi edhe në pjesën e dytë, ku në minutën e 53-të, Ismail Yuksek iu afrua golit me një goditje të fuqishme me kokë pas një harkimi nga këndi, por sërish Maignan doli fitues nga ky duel. Ndëshkimi për rastet e humbura erdhi vetëm një minutë më vonë, në minutën e 54-të. Michael Olise shërbeu për Kylian Mbappe, i cili me një lëvizje mjeshtërore brenda zonës, dërgoi topin në këndin e poshtëm të djathtë të portës kundërshtare, duke zhbllokuar rezultatin. Situata për turqit u vështirësua edhe më shumë në minutën e 88-të, kur portieri Ugurcan Çakır u ndëshkua me karton të kuq, duke e lënë ekipin e tij me një lojtar më pak në fushë deri në vërshëllimën e fundit. Pas kësaj xhiroje të parë në Grupin 1, Belgjika dhe Franca ndajnë kreun e tabelës me nga 3 pikë secila, ndërsa Turqia dhe Italia mbeten pa pikë.