Sulmi ndaj gazetarit Bledi Mane: Më gjuajtën me gurë e vezë dhe më ndoqën 30 veta gjatë protestës

Gazetari i njohur Bledi Mane është bërë objekt i një sulmi fizik dhe verbal nga një grup protestuesish gjatë zhvillimit të tubimit të njohur si “Revolucioni Flamingo”, pranë ndërtesës së Kuvendit. Gjatë incidentit, disa prej protestuesve janë dëgjuar duke e fyer me thirrjet “servili i Ramës”, ndërkohë që vetë gazetari u është drejtuar duke u kërkuar llogari për arsyet e këtij sulmi të papritur. Një ditë pas ngjarjes, Mane ka ndarë me ndjekësit e tij në Instagram detaje të plota rreth asaj që ndodhi në mesditën e 5 tetorit. Sipas dëshmisë së tij, rreth orës 16:00, teksa po lëvizte i qetë në rrugën “Abdi Toptani”, ai është vënë në ndjekje nga një grup prej afro 30 personash, të cilët e kanë gjuajtur me vezë dhe e kanë goditur me një gur të vogël në pjesën e prapme të kokës. Duke rrëfyer dinamikën e ngjarjes, gazetari thekson se u ndal për t'u kërkuar shpjegim protestuesve se çfarë kishin personalisht me të, por situata agravohet menjëherë. Sipas tij, turma nisi ta shante, ta fyer dhe ta kërcënonte në kor në mënyrë të organizuar, ndërsa mes tyre kishte edhe persona të mitur që i jepnin lezione se si duhet të bëjë gazetari. Mane shton se nuk është larguar me vrap, por është përballur me turmën pa frikë, duke kujtuar se ndaj tij nuk rëndon asnjë akuzë për korrupsion apo vrasje. Ai e cilëson këtë si një precedent të rrezikshëm në historinë e Shqipërisë, ku një gazetar sulmohet publikisht thjesht për shkak të mendimeve dhe detyrës së tij. Në fund të reagimit të tij, gazetari ka falënderuar kolegët, organizatat e mediave, Policinë e Shtetit dhe trupin diplomatik për solidaritetin e treguar, ndërsa u ka bërë thirrje gjithë gazetarëve të vijojnë punën e tyre pa u frikësuar nga presioni i turmave të dëshpëruara.