Elon Musk kap sërish shifrën e trilionerit, pasuria e tij ngrihet fuqishëm

Manjati i teknologjisë, Elon Musk, është ngjitur sërish në majën e trilionerëve, pasi performanca e shkëlqyer e aksioneve të dy kompanive të tij kryesore, SpaceX dhe Tesla, i ka shtuar rreth 65 miliardë dollarë pasurisë vetjake brenda një dite të vetme tregtimi. Të dhënat nga Indeksi i Miliarderëve të Bloomberg tregojnë se vlera e pasurisë së Musk ka prekurs shifrën e 1.04 trilionë dollarëve, duke u rikthyer zyrtarisht mbi këtë prag pas një periudhe prej rreth tre muajsh. Kjo ecuri pozitive u regjistrua pasi titujt e SpaceX shënuan një ngritje prej 7.6% gjatë ditës së hënë, duke u kuotuar në 171.09 dollarë, ndërkohë që aksionet e prodhuesit të automjeteve elektrike Tesla avancuan me 2.17% për të kapur vlerën 378.62 dollarë. Aktualisht, SpaceX vlerësohet në treg përafërsisht 2.32 trilionë dollarë, ndërsa kapitalizimi i tregut për Tesla-n llogaritet në rreth 1.5 trilionë dollarë. Kujtojmë se themeluesi i inovacioneve kishte arritur për herë të parë kufirin prej 1 trilion dollarësh në muajin qershor, pas daljes së SpaceX në bursën Nasdaq, ngjarje e cila solli një hov të jashtëzakonshëm të aksioneve. Ndonëse pasuria e tij pati prekur përkohësisht nivelin e rreth 1.3 trilionë dollarëve, ajo pësoi një korrigjim rënës për shkak të luhatjeve të tregut gjatë muajve të pasardhës. Ky rikthim i fuqishëm në krye është stimuluar nga besimi i shtuar i investitorëve te projekti i SpaceX dhe nga performanca financiare e Tesla-s, e cila ka tejkaluar parashikimet e analistëve. Për më tepër, mbi 98% e pasurisë totale të Musk vazhdon të jetë e lidhur ngushtë me aksionet dhe pronësitë e tij në këto dy ndërmarrje gjigante, duke e mbajtur atë në vendin e parë në listën e njerëzve më të pasur në globin tonë.