Skandali me skemat sociale: Zbulohen mbi 4500 përfitues fiktivë, mes tyre persona të vdekur e të shpërngulur

Institucionet kompetente kanë zbuluar mbi 4,500 raste të taksapaguesve dhe përfituesve të rremë të ndihmës minimale të garantuar dhe sigurimeve shoqërore, gjatë një sërë kontrollesh të realizuara së fundmi. Këtë e bëri të ditur kryeministri Hristijan Mickoski, i cili theksoi se nga buxheti i shtetit janë paguar fonde për persona që nuk ekzistojnë ose nuk i plotësojnë kushtet. Sipas kreut të Qeverisë, mes listave të përfituesve janë konstatuar raste kur paratë publike kanë përfunduar në llogaritë e personave të ndjerë, qytetarëve të zhvendosur, si dhe përfituesve fiktivë. “Deri më tani, kemi më shumë se 4500, pra jo 45, jo 450, por 4500 përfitues të rremë të ndihmës minimale të garantuar dhe sigurimeve shoqërore”, deklaroi Mickoski. Ai bëri të ditur se pas përfundimit të analizave dhe verifikimeve në terren, fatura për pagesat e këtij muaji rezulton të jetë rreth 200 milionë denarë më e ulët në krahasim me periudhën e njëjtë të vitit të kaluar. “Si është e mundur kjo? Është e mundur sepse përfituesit ishin, për fat të keq, persona të vdekur, persona të zhvendosur, persona të rremë e kështu me radhë”, shtoi më tej kryeministri. Llogaritjet e deritanishme tregojnë se nga arka e shtetit shpenzoheshin çdo vit mbi një miliard denarë për këto pagesa të paligjshme, ndërsa në disa përllogaritje shuma ka kapur shifrën deri në 1.5 miliardë denarë. Megjithatë, procesi i verifikimit mbetet i hapur. Mickoski njoftoi se ende nuk janë shqyrtuar të gjitha rastet, duke sqaruar se mbetet për t'u kontrolluar afërsisht një e pesta deri në një të gjashtën e numrit të përgjithshëm të përfituesve. Kryeministri paralajmëroi gjithashtu se aksioni i kontrolleve nuk do të ndalet vetëm te skemat sociale dhe sigurimet shoqërore, por do të shtrihet edhe në sektorë të tjerë kyç, me fokus të veçantë te shëndetësia. Sipas vlerësimeve zyrtare, vlera financiare e kursimeve nga këto kontrolle deri në këtë fazë arrin në rreth 25 milionë euro në vit. "Dikush do të thotë: 'Në rregull, pra ky është vetëm një kontroll i thjeshtë, për çfarë lloj reforme po flisni?' Një reformë që është 25 milionë euro", u shpreh Mickoski. Në fund, ai theksoi se kursimet e siguruara përmes këtyre masave dhe kontrolleve rigoroze në sektorë të ndryshëm do të ridrejtohen drejt investimeve kapitale, duke krijuar kështu kushte më të favorshme për investime të reja dhe nxitjen e zhvillimit ekonomik të vendit.