Nis ethet e derbit: Partizani i bën thirrje mbështetësve për kthesën e madhe ndaj Tiranës

Klubi i Partizanit ka ndezur sërish atmosferën në prag të derbit të kryeqytetit kundër Tiranës, një sfidë e vlefshme për javën e gjashtë të “Abissnet Superiore”, e cila do të luhet këtë të dielë. Përmes një postimi në rrjetet sociale, gjiganti i kuq ka ndarë imazhe nga mbështetja e zjarrtë e tifozerisë së tij, duke u bërë thirrje të gjithë simpatizantëve që të bëhen pjesë e një mbrëmjeje spektakolare dhe të japin mbështetjen e tyre maksimale nga shkallët e stadiumit. Prania e njohur e grupit të tifozëve “Ultras Guerrils” pritet t'i japë një shtysë të fortë skuadrës në këtë periudhë të ndjeshme, ndërkohë që trajneri Florin Bratu do të ketë mbështetjen e fuqishme të tribunave për të rikthyer grupin e tij në rrugën e duhur të rezultateve.