“I bëri ballë plumbave të Serbisë, por e rrëzoi polica”: Shukri Buja shpërthen pas dhunimit të veteranit në Prishtinë

Ish-komandanti i Zonës Operative të Nerodimes, Shukri Buja, ka reaguar ashpër ndaj ngjarjeve të protestës së djeshme në kryeqytet, ku pamjet e publikuara shfaqën një ndërhyrje të dhunshme të Policisë së Kosovës ndaj një prej protestuesve. Nëpërmjet një prononcimi publik, Buja ka bërë të aforuar se personi në fjalë është Gazmend Bytyqi, të cilin e ka identifikuar si veteran të Ushtrisë Çlirimtare të Kosovës dhe ish-pjesëtar të Njësisë Speciale brenda Zonës Operative të Nerodimes. Duke komentuar veprimin e forcave të rendit përmes një postimi në rrjetet sociale, ish-komandanti ka vënë në pah kontrastin mes sakrificës së kaluar në luftë dhe trajtimit aktual shtetëror. “Serbia e goditi me plumba, por nuk e rrëzoi. Përballoi dhimbjen, plagët dhe tmerrin e luftës, sepse e dinte për çfarë po luftonte. Por sot… e rrëzoi dora e një polici të shtetit për të cilin ai dhe shokët e tij derdhën gjak”, ka theksuar Buja në reagimin e tij. Më tej, ai ka shtuar se akti i ndërhyrjes ndaj Bytyqit mbart një simbolikë shumë më të rëndë sesa thjesht një incident i zakonshëm. “Ajo dorë nuk goditi vetëm një veteran. Goditi plagët tua. Goditi sakrificën tënde. Goditi lirinë që e fituat me gjak”, ka shkruar më tej ish-komandanti. Në fund të reagimit të tij, Buja ka përcjellë një mesazh mbështetjeje për bashkëluftëtarin e tij, duke e cilësuar atë si një simbol të gjallë të lirisë së vendit. “Më dhemb për ty, bashkëluftëtari im. Më dhemb edhe më shumë kur shoh se si trajtohet liria për të cilën luftuam”, ka përfunduar ai.