De la Fuente ngre alarmin për kalendarin e ngjeshur para sfidës me Kroacinë

Kombëtarja e Spanjës bëhet gati të mbyllë serinë e katër ndeshjeve të Ligës e Kombeve, teksa do të matë fuqitë mbrëmjen e sotme kundër Kroacisë në stadiumin “Poljud” të Splitit. Në prag të këtij dueli, selektori Luis de la Fuente ka kërkuar përqendrim maksimal nga të e tij, duke larguar çdo mendim për nënvlerësim të kundërshtarit, pavarësisht disfatës së rëndë 7-0 që kroatët pësuan së fundmi nga Anglia. “Ata janë një skuadër e jashtëzakonshme me futbollistë të jashtëzakonshëm. Ajo që ndodhi pak ditë më parë ishte thjesht një incident futbollistik. Ne synojmë të ruajmë standardin e lartë që kemi shfaqur deri më tani. Do të përballemi me një rival shumë të motivuar, por edhe motivimi ynë është në nivele të larta. Ne e pëlqejmë lojën në një atmosferë të tillë“, u shpreh De la Fuente. Pjesë e rëndësishme e diskutimit ka qenë edhe menaxhimi i talentit Lamine Yamal, i cili është aktivizuar si titullar në çdo takim deri tani. Për këtë çështje, trajneri ka vendosur një vijë të kuqe të qartë: “Askush nuk do të luajë më shumë se 270 minuta. Ne po luftojmë për kualifikim. Lamine është gjithmonë gati për të luajtur, të gjithë duan të luajnë”. “Do të vlerësojmë nëse aktivizimi i tij është i përshtatshëm apo jo. Ai gëzon një formë fantastike, përbën një shembull për t’u ndjekur dhe është një luftëtar i vërtetë. Ndodhet në kushte optimale për të zbritur sërish në fushë. Ai zotëron atë shtysë të brendshme, jo në kuptimin negativ, sepse dëshiron gjithmonë të japë më shumë“, shtoi numri një i stafit teknik spanjoll. Në fund, strategu spanjoll nuk i ka kursyer kritikat ndaj kalendarit, duke shprehur hapur rezervat e tij për strukturën e re të garës: “Më pëlqen të garoj, por qëndrimi im mbetet i pandryshuar. Katër ndeshje në dhjetë ditë janë shumë. E preferoja modelin e vjetër, megjithatë ne nuk jemi nga ata që bëjmë ankesa, thjesht përshtatemi”.