Pendimi i madh i Gerrard: Po ta dija se do të vinte Klopp, kurrë nuk do të isha larguar nga Liverpooli

Steven Gerrard ka zbuluar se vendimi i tij për t'u larguar nga Liverpooli do të kishte qenë krejtësisht ndryshe, sikur të kishte pasur dijeni paraprake se Jurgen Klopp do të vishej me petkun e trajnerit vetëm pak muaj më vonë. Ikona e “Reds” i dha theks fundit aventurës së tij në Angli në verën e vitit 2015 për të nisur një eksperiencë të re te LA Galaxy, ndërkohë që strategu gjerman u zyrtarizuar në krye të pankinës angleze në tetor të po atij viti, duke bërë që dyshja të mos kryqëzohej kurrë në fushë. Duke analizuar periudhën kur u largua nga “Anfield”, ish-kapiteni legjendar pranoi se do të kishte hequr dorë nga shumë gjëra në planin personal dhe profesional vetëm e vetëm që të kishte fatin të stërvitej nga Klopp. “Do të sakrifikoja shumë gjëra, profesionalisht dhe personalisht, vetëm për të pasur mundësinë të luaja për Kloppin”, është shprehur hapur Gerrard. Në muajt e tij të fundit me klubin e zemrës, Gerrard kishte në tavolinë një propozim për të vazhduar bashkëpunimin edhe për një edicion tjetër, mirëpo pasiguritë rreth hapësirave që do të kishte e shtynë drejt largimit. “Më ishte ofruar një kontratë njëvjeçare për të qëndruar edhe një sezon te Liverpooli. Por, nga bisedat që kisha me stafin e klubit në atë kohë, kuptova se do të isha më shumë një lojtar dytësor, me më pak minuta dhe jo aq aktiv sa do të dëshiroja”, ka sqaruar ai. Sipas tij, prania e gjermanit do të kishte përmbysur çdo skenar, pasi ai do të tentonte me çdo kusht ta bindte teknikun e ri për vlerat e tij. “Nëse do ta dija se Jurgen do të vinte, do të kisha rrezikuar të qëndroja. Do të provoja ta bindja atë dhe ndoshta do të kisha pasur një mundësi në fund të karrierës sime. Fatkeqësisht, mora vendimin për t’u larguar. Tani, duke e parë në retrospektivë, do të kisha qëndruar dhe do ta kisha marrë atë rrezik”, ka deklaruar ndër të tjera Gerrard. Më pas, Jurgen Klopp ndërtoi një cikël të jashtëzakonshëm fituesish te Liverpooli, duke arkivuar në palmaresin e klubit tetë trofe madhorë, ku spikatën triumfet në Premier League, Ligën e Kampionëve dhe FA Cup. Nëse do të kishte vendosur të mbetej pjesë e ekipit në moshën 35-36-vjeçare, Gerrard do të kishte pasur mundësinë të shtonte edhe trofe të tjerë të rëndësishëm në karrierën e tij, pavarësisht se roli i tij në fushë mund të ishte më shumë mbështetës nga bankina rezervë.