Situata e alarmit nga flakët: 46 vatra zjarri në mbarë vendin, shtatë ende aktive

Qendra për Menaxhimin e Krizave (QMK) ka bërë të ditur se gjatë orëve të mëngjesit, deri në orën 07:30, në territorin e vendit janë regjistruar gjithsej 46 vatra zjarri në hapësira të hapura. Bazuar në raportet e fundit zyrtare, flakët vazhdojnë të jenë aktive në shtatë lokacione, vetëm një vatër është vendosur nën kontroll, ndërkohë që pjesa tjetër e zjarreve janë shuar plotësisht ose janë lokalizuar. Sipas autoriteteve, vatrat aktive po regjistrohen në rajonin e njohur si “Nad Borovite”, ku flakët janë shtrirë në dy drejtime: njëri kah fshatrat Tatar Elevci dhe Korab, kurse tjetri drejt vendbanimit Banjishte në komunën e Dibrës. Probleme me zjarret po paraqiten edhe në afërsi të fshatit Jabolçishtë në Çashkë, si dhe pranë fshatit Strima në Likovë. Po ashtu, situata mbetet sfiduese në Malin e Sharrit, mbi Liqenin e Bogovinës, në zonën e deponisë Krasta në Kumanovë, pranë fshatit Dobroveni në komunën e Novacit, si dhe në hapësirën ndërmjet fshatrave Belçishtë dhe Lesani në komunën e Dëbërcës.