“As me një milion qytetarë në Prishtinë”: Reagimi i ashpër i Milaim Nelës ndaj protestave për Gjykatën Speciale

Publicisti i njohur Milaim Nela ka lëshuar një reagim të ashpër lidhur me protestat e organizuara në kryeqytetin e Kosovës, duke i cilësuar ato si tubime pa kuptim dhe me karakter shtetshkatërrues. Sipas tij, këto zhvillime nuk mund të kenë asnjë ndikim mbi vendimet e Gjykatës Speciale në Hagë, ndërsa u ka bërë thirrje qytetarëve që të mos bien pre e manipulimeve për agjenda politike. Nela ka vënë në pah se çdo tentativë për të ndërhyrë në ligjin e Dhomave të Specializuara në këtë fazë kritike mund të rrezikojë seriozisht procesin e Apelit dhe të minojë imazhin dhe kredibilitetin e shtetit të Kosovës. Ai ka argumetuar se mbështetja e vërtetë dhe e vetme për personat e dënuar konsiston në një përgatitje të mirëfilltë juridike për shkallën e dytë. Duke shprehur dhimbje të thellë për situatën, Nela ka kujtuar se ndjek protestat në Kosovë qysh nga viti 1981, por nuk ka parë kurrë më parë tubime kaq pa sens. Ai u ka bërë thirrje bashkëkombësve të mendojnë me kthjellësi dhe të mos shërbejnë si mish për top kundër shtetit të tyre, duke theksuar se vendimet e kësaj gjykate – e cila është themeluar nga vetë institucionet e Kosovës – nuk ndryshojnë përmes protestave, qofshin në sheshet e Prishtinës apo para selisë në Hagë. Në këtë optikë, publicisti ka propozuar se i vetmi veprim politik që do t'i shërbente kauzës së Kosovës do të qe miratimi i një ligji të detyrueshëm nga Kuvendi për Qeverinë Kurti, me qëllim paditjen e Serbisë për gjenocid dhe krime kundër njerëzimit në gjykatat ndërkombëtare. Sipas tij, një nismë e tillë, që do të përfshinte krimet serbe nga viti 1861 deri më 1999, do të ishte e vetmja rrugë për ta vënë Serbinë përballë përgjegjësisë.