Vlora Çitaku: Institucioni i Kuvendit është rrethuar nga njësitet policore

Sekretarja e Përgjithshme e Partisë Demokratike të Kosovës, Vlora Çitaku, ka bërë të publikuar faktin se hapësirat e Kuvendit të Kosovës janë mbushur me praninë e forcave të rendit. Në reagimin e saj, ajo ka ngritur dilema të hapura rreth këtij vendimi, duke kërkuar përgjigje se me urdhër të kujt dhe për çfarë qëllimi është ndërmarrë një mobilizim i tillë i pazakontë. “Nuk po na godet e sulmon askush. Ka vetëm një thirrje popullore: të votohet ligji për Dhomat e Specializuara. Në rrugë e në sheshe janë vajzat e djemtë tanë. Janë fëmijë të dëshmorëve. Janë të rinj e të reja që e duan Kosovën. Që e duan UÇK-në. Që kanë dalë të kërkojnë votimin e një ligji që tashmë është miratuar në parim me 91 vota. Albin, eja në Kuvend. Ta votojmë ligjin. Mos e eskalo situatën. Ta përmbyllim këtë çështje me votë, me përgjegjësi dhe me qetësi”, ka shkruar ndër të tjera ajo në postimin e saj.