Asllani kthehet me gol, por mbetet i pakënaqur: Lëshuam fitoren, në nëntor kërkojmë maksimumin

Sulmuesi Fisnik Asllani është shprehur i kënaqur me nivelin e lojës që ka shfaqur Përfaqësuesja e Kosovës ndaj Austrisë, pavarësisht faktit se “Dardanët” nuk mundën të siguronin triumfin në këtë përballje. Takimi i zhvilluar të dielën në mbrëmje në stadiumin “Fadil Vokrri” në Prishtinë u mbyll me barazimin 1-1, një duel ku skuadra vendase dëshmoi grintë dhe konkurrueshmëri të lartë përballë kundërshtarit austriak. Autor i golit të vetëm për Kosovën, Asllani, vlerësoi paraqitjen e përgjithshme të grupit, ndërsa shprehu keqardhje që tri pikët nuk u arritën. “Fatkeqësisht nuk arritëm ta fitojmë lojën. Do të kishte qenë një ndjenjë ndryshe nëse do ta kishim fituar ndeshjen. Kemi bërë një lojë të mirë. Shpresoj që në muajin nëntor të zhvillojmë dy ndeshje të mira”, u shpreh Asllani. Futbollisti i vijës së sulmit vuri në dukje energjinë pozitive të grupit, duke pranuar njëkohësisht se gjendja e fushës nuk ishte në kushtet më të mira të mundshme. “Energjia ka qenë e lartë, fusha nuk ka qenë më e mira. Jam munduar t’i jap energji ekipit. Jam shumë mirë fizikisht. Muajin e ardhshëm ndeshjen e parë e kemi me Izraelin dhe synojmë ta fitojmë këtë ndeshje. Do të japim maksimumin në dy ndeshjet e ardhshme”, deklaroi Asllani. Në të njëjtën linjë ka qenë edhe mesfushori Leon Avdullahu, i cili barazimin e parë e ka parë si një mundësi të humbur për “Dardanët”. “Besoj se i humbëm dy pikë në këtë ndeshje. Por sonte treguam se çfarë mund të bëjmë”, theksoi Avdullahu pas përfundimit të sfidës në “Fadil Vokrri”. Lojtari i skuadrës së Hofenhajmit e cilësoi paraqitjen si dëshmi se Kosova mund të matet barabartë me ekipe të kalibrit austriak. Tashmë, vëmendja e Përfaqësueses është zhvendosur plotësisht te sfidat e muajit nëntor, ku synimi mbetet arkëtimi i pikëve të plota.