Vizita e Gjekmarkajt në Kroaci, theksohet mirënjohja për mbështetjen ndaj Kosovës dhe integrimit evropian

Nënkryetari i Kuvendit të Shqipërisë, Agron Gjekmarkaj, ka nisur një vizitë zyrtare dyditore në shtetin kroat, ku gjatë ditës së parë ka realizuar një sërë takimesh me figura kyçe të politikës dhe institucioneve të atjeshme. Në qendër të agjendës së tij ishte takimi me kryetaren e Komisionit për Bashkëpunim Ndërparlamentar në Parlamentin e Kroacisë, Kristina Ikić Baniček. Gjatë këtij bashkëbisedimi u shkëmbyen mendime mbi forcimin e lidhjeve ndërparlamentare mes dy vendeve, ndihmën e deritanishme të Kroacisë në rrugën e Shqipërisë drejt Bashkimit Evropian, si dhe tematikat që prekin interesat e shqiptarëve në rajon. Gjatë këtij takimi, Gjekmarkaj përcjelli gjithashtu përshëndetjet e liderit të opozitës shqiptare, Sali Berisha, i cili ka vlerësuar lart angazhimin e znj. Baniček dhe ligjvënësve të tjerë kroatë për mbështetjen e dhënë ndaj Kosovës për anëtarësimin në Këshillin e Evropës. Në përfundim, numri dy i Kuvendit të Shqipërisë përsëriti falënderimet për partneritetin e palëkundur të Zagrebit zyrtar ndaj Prishtinës dhe Tiranës, duke nënvizuar se vlera e eksperiencës kroate në proceset eurointegruese është e një rëndësie të dorës së parë për Shqipërinë.