Vlora Çitaku bën thirrje për kthimin e deputetëve në sallë dhe votimin e Ligjit për Dhomat e Specializuara

Deputetja e Partisë Demokratike të Kosovës (PDK), Vlora Çitaku, ka bërë të qartë se subjekti i saj politik do të mbetet i pranishëm në sallën e Kuvendit, ndërkohë që u ka bërë thirrje forcave të tjera parlamentare që t'i bashkohen seancës për të mundësuar miratimin e ligjit në lexim të dytë. Duke folur pas përfundimit të seancës së jashtëzakonshme, Çitaku ka theksuar se procesi i votimit të këtij projektligji nuk ka asnjë lidhje me çështjen e zgjedhjes së presidentit, duke i cilësuar ato si situata krejtësisht të ndara nga njëra-tjetra. "I ftojmë të gjithë deputetët të kthehen në sallë dhe të votojnë në lexim të dytë Ligjin për Dhomat e Specializuara. Çështja e ligjit dhe çështja e presidentit janë të ndara. Votimi i ligjit është detyrim jo vetëm politik, por edhe kombëtar. Çështja e presidentit është çështje e marrëveshjes, janë totalisht të ndara", u shpreh ajo.