Kalon në lexim të parë Projektligji për Byronë Shtetërore, ja vota surprizë nga radhët e PDK-së

Kuvendi i Kosovës ka hedhur hapin e parë drejt miratimit zyrtar, duke kaluar në shqyrtim të parë Projektligjin nr. 11/L-006 për Byronë Shtetërore për Verifikimin dhe Konfiskimin e Pasurisë së Pajustifikueshme. Dokumenti ligjor ka siguruar konsensus nga ligjvënësit e pranishëm në seancë, duke u miratuar me 81 vota pro, pa pasur asnjë votë kundër apo abstenim. Megjithatë, procesi i votimit është shoqëruar me zhvillime politike brenda opozitës. Nga Grupi Parlamentar i Partisë Demokratike të Kosovës, në sallë ka qëndruar dhe ka votuar vetëm deputeti Rrustem Mustafa. Pjesa tjetër e deputetëve të kësaj force politike ka braktisur seancën pak çaste para votimit, si reagim ndaj moshedhjes në votim të mocionit për shqyrtimin e dytë të Ligjit për Gjykatën Speciale brenda së njëjtës ditë.