Pakënaqësitë me qëndrimin ndaj Speciales sjellin dorëheqjen e asambleistit të LDK-së në Obiliq

Si pasojë e qëndrimit të Lidhjes Demokratike të Kosovës (LDK) se nuk do ta mbështesë ndryshimin e Ligjit për Dhomat e Specializuara, ka reaguar asambleisti i kësaj partie në Kuvendin Komunal të Obiliqit, Labinot Mirena. Mirena ka bërë të ditur se është tërhequr përfundimisht nga të gjitha strukturat e LDK-së, ndërsa ka sqaruar se rrugëtimin e tij politik në Kuvendin Komunal do ta vazhdojë si përfaqësues i pavarur. Sipas tij, ky vendim drastik ka ardhur si rezultat i mospajtimit të hapur me linjën që subjekti i tij politik ka mbajtur ndaj ish-udhëheqësve të Ushtrisë Çlirimtare të Kosovës (UÇK), të cilët aktualisht po përballen me procesin gjyqësor në Hagë. “Ky vendim shpreh mospajtimin tim të thellë me qëndrimin e LDK-së ndaj krerëve të UÇK-së që po gjykohen në Hagë. Për mua, kjo nuk është vetëm çështje politike apo partiake, por çështje parimesh dhe bindjesh personale, mbi të cilat nuk mund të bëj kompromis”, ka theksuar Mirena në njoftimin e tij. Ai gjithashtu ka vlerësuar se pozicionimi i LDK-së rreth kësaj teme është në kundërshtim të plotë me vlerat dhe idealet që ai vetë ka mbrojtur deri më sot. “Prandaj, nga sot mandatin tim në Kuvendin Komunal të Obiliqit do ta vazhdoj si asambleist i pavarur, me qëndrime të qarta dhe me përgjegjësi para qytetarëve të Obiliqit që më kanë dhënë besimin për t’i përfaqësuar”, ka përfunduar ai.