Gruda: Kadri Veseli u dënua përtej aktakuzës, prokurori nuk e ngarkoi për përfshirje direkte

Gjatë një paraqitjeje televizive në emisionin “Tempus”, deputeti i Partisë Demokratike të Kosovës (PDK), Përparim Gruda, ka ngritur shqetësime lidhur me procesin gjyqësor ndaj Kadri Veselisë, duke pohuar se ai nuk është akuzuar për ndonjë përfshirje direkte në krime nga ana e organit të akuzës, por megjithatë është dënuar përtej kufijve të aktakuzës. “Kadri Veseli në aktakuzë nuk akuzohet për asnjë pjesëmarrje direkte në krim. E ka thënë prokurori në sallë para tri vjetëve, e ka të shkruar në aktakuzë. Ky dënohet për veprime direkte. A ka vend që e duron që një gjyqtar me dënu një të akuzum përtej akuzës?”, deklaroi Gruda gjatë diskutimit. Më tej, zyrtari i PDK-së vuri theksin te mungesa e transparencës, duke e krahasuar atë me standardet e zbatuara në shkallën e parë të gjykimit në Hagë dhe duke kërkuar llogaridhënie publike për procese që prekin të kaluarën e vendit. “Është e papranueshme, s’po du me diskutu ma sa është transparenca në gjykatën e parë të Hagës. Seancat kanë qenë të hapura; kur u dasht mu mbrojt dëshmitari, ju ka prish zani. Këtu s’ka pas fare. Populli duhet me ditë publikisht gjyqin që e përlyn historinë e vendit”, përfundoi Gruda.