Inovacioni në Podujevë, Shpejtim Bulliqi siguron marrëveshje në Turqi për trajnimin e nxënësve në teknologji

Kryetari i Komunës së Podujevës, Shpejtim Bulliqi, ka ndërmarrë një vizitë zyrtare në Turqi, ku ka zhvilluar një sërë takimesh të rëndësishme me personalitete të institucioneve dhe kompanive të njohura turke. Gjatë qëndrimit të tij në qytetin Şanlıurfa, ku po mbahet Festivali i Aviacionit TEKNOFEST, kreu i Podujevës ka formalizuar bashkëpunimin përmes nënshkrimit të një marrëveshjeje me Dr. Elvan Kuzucu Hıdır, e cila drejton Bordin e T3 Vakfı dhe është gjithashtu anëtare e Bordit të Agjencisë Hapësinore të Turqisë. Sipas njoftimit zyrtar nga komuna, ky akord synon krijimin e një qendre të specializuar trajnimi për nxënësit llapjanë, duke u ofruar atyre mundësi zhvillimi në sektorët e shkencës, inovacionit dhe teknologjisë. Iniciativa përfshin një program dyvjeçar për nxënësit e përzgjedhur, të cilët do të kenë rastin të specializohen në fusha si kodimi, robotika, inteligjenca artificiale, elektronika dhe teknologjia hapësinore. Për më tepër, projekti u siguron atyre edhe një vit praktikë dhe angazhim të drejtpërdrejtë në nisma praktike. Duke vënë në dukje rëndësinë e këtij hapi, Bulliqi ka theksuar se Podujeva bëhet komuna e parë në mbarë vendin që arrin një marrëveshje kaq të avancuar, e cila u mundëson talentëve të rinj të spikatur që të përfaqësohen edhe në garat ndërkombëtare të teknologjisë. Në vijim të agjendës së tij, i pari i Podujevës ka zhvilluar një takim edhe me Ali Oğuz, drejtor i TÜME (Tarım Teknolojileri Kümelenmesi), që është entiteti organizativ i hapësirës së teknologjive bujqësore brenda festivalit TEKNOFEST. Duke qenë se TÜME përfaqëson 22 kompani të mëdha turke të fokusuara në zhvillimin e zgjidhjeve inovative për bujqësinë, bisedimet janë përqendruar te mundësitë e shkëmbimit të ekspertizës, me synimin përfundimtar që nga këto risi të përfitojnë drejtpërdrejt fermerët e Podujevës. Ndryshe, në nisje të kësaj vizite dyditore, kryetari Bulliqi është pritur në takim edhe nga Selçuk Bayraktar, drejtor i teknologjisë (CTO) i prodhuesit të njohur të dronëve, kompanisë Bayraktar.